42,5 mlrd soʻmlik soliqlarni toʻlashdan qasddan boʻyin tovlagan MChJ masʼullari aniqlandi
Toshkent viloyati soliq boshqarmasi vakillari esa mazkur MChJlarda oʻtkazilgan audit tekshiruvlarida dalolatnomalarni 5,2 mlrd soʻm soliqlarni hisoblamasdan rasmiylashtirgan.
Toshkent viloyatida soliqdan qochganlar va soliq hisoblamagan soliqchilar fosh etildi.
Bosh prokuratura huzuridagi Departament va Soliq qoʻmitasi hamkorligida tergovga qadar tekshiruv oʻtkazildi.
Unda 6 ta MChJ masʼul shaxslari va boshqalar 32,6 mlrd soʻmlik qoʻshilgan qiymat soligʻini byudjetdan qaytarib olib, 195,9 mlrd soʻmlik mahsulotlarni naqd pulga sotib, savdodan tushgan pullarni bankka topshirmasdan juda koʻp miqdordagi savdo qoidalarini buzib, 42,5 mlrd soʻmlik soliqlarni toʻlashdan qasddan boʻyin tovlaganlar.
Tekshiruvda Toshkent viloyati soliq boshqarmasi masʼul shaxslari tomonidan mazkur MChJlarda oʻtkazilgan audit tekshiruvlarida tekshiruv dalolatnomalarini 5,2 mlrd soʻm soliqlarni hisoblamasdan rasmiylashtirganliklari natijasida, davlat va jamiyat manfaatlariga juda koʻp miqdorda zarar yetkazganliklari aniqlangan.
Mazkur holat yuzasidan Jinoyat kodeksining tegishli moddalari bilan jinoyat ishi qoʻzgʻatilib, tergov harakatlari oʻtkazilmoqda.
