Toshkentda 356 nafar fuqaroning mulkiy huquqlari eʼtirof etildi
Kadastr muhandislari tomonidan poytaxt mahallalarida joylashgan 70 000 dan ziyod koʻchmas mulk obʼekti toʻliq xatlovdan oʻtkazildi.
Toshkent shahrida 356 nafar fuqaroning mulkiy huquqlari eʼtirof etildi.
Xalq deputatlari Toshkent shahri Kengashining navbatdagi sessiyasida Davlat kadastrlari palatasi Toshkent shahar boshqarmasi tomonidan amalga oshirilgan xatlov ishlari natijalari eʼlon qilindi.
Unda yana 356 nafar fuqaroning yakka tartibdagi uy-joylari, ular joylashgan yer uchastkalariga nisbatan egalik huquqlari eʼtirof etildi.
Shu tariqa, Toshkent shahrida “Oʻzboshimchalik bilan egallab olingan yer uchastkalariga hamda ularda qurilgan binolar va inshootlarga boʻlgan huquqlarni eʼtirof etish toʻgʻrisida”gi 937-sonli Qonun ijrosi boʻyicha huquqlari eʼtirof etilgan fuqarolar soni 402 nafarga yetdi.
Bugungi kunga qadar kadastr muhandislari tomonidan poytaxt mahallalarida joylashgan 70 000 dan ziyod koʻchmas mulk obʼekti toʻliq xatlovdan oʻtkazildi.
