“Hududgaztaʼminot” va “Texnopark” masʼullari 19 mlrd soʻm byudjet mablagʻini oʻzlashtirgani aniqlandi
Pullar elektron gaz hisoblagichlariga texnik xizmat koʻrsatish niqobi ostida talon-toroj qilingan.
Toshkent shahrida 19,9 mlrd soʻmlik byudjet mablagʻining talon-toroji fosh etildi.
Bosh prokuratura huzuridagi Departament tomonidan tergovga qadar tekshiruv oʻtkazilgan.
Unda “Hududgaztaʼminot” AJ va “Texnopark” MChJning masʼul shaxslari va boshqalar oʻzaro til biriktirib, goʻyoki elektron gaz hisoblagichlariga texnik xizmat koʻrsatish maqsadida 19 mlrd soʻmlik byudjet mablagʻlarini oʻzlashtirish yoki rastrata qilish yoʻli bilan talon-toroj qilganliklari aniqlangan.
Shuningdek, “Texnopark” MChJ tomonidan ishlab chiqarilgan va “Hududgaztaʼminot” AJ tomonidan isteʼmolchilarga oʻrnatilgan 273 dona gaz hisoblagich koʻrsatkichlarining kam hisoblanganligi natijasida davlat va jamiyat manfaatlariga 861,1 mln soʻmlik zarar yetkazganliklari aniqlangan.
Mazkur holat yuzasidan Jinoyat kodeksining tegishli moddalari bilan jinoyat ishi qoʻzgʻatilib, tergov harakatlari oʻtkazilmoqda.
