Sirdaryoda mahalliy byudjetdan 17,2 mlrd soʻm ajratildi

Sirdaryoda viloyat byudjetining oshirib bajarilgan qismidan 17,2 milliard soʻm ajratildi. Bu haqda Xalq deputatlari viloyat kengashi qarorida aytiladi. Qaror 2026 yil 22 iyul kuni eʼlon qilindi.

Sirdaryo viloyatida mahalliy budjetning 2026 yil II choragida rejadan ortiq shakllangan daromadlari hisobidan 17 milliard 245 million soʻm mablagʻni taqsimlash boʻyicha qaror qabul qilindi. Qoʻshimcha mablagʻlar infratuzilma, qurilish, taʼmirlash, obodonlashtirish va raqamli texnologiyalarni rivojlantirishga yoʻnaltirilmoqda.

Ajratilgan mablagʻlar tarkibida eng yirik ulush Guliston shahridagi viloyat Sogʻliqni saqlash boshqarmasi binosini taʼmirlashga toʻgʻri keladi. Mazkur maqsad uchun 6 milliard soʻm yoʻnaltirilgan boʻlib, bu umumiy mablagʻning qariyb uchdan bir qismini tashkil etadi. Bu qarordagi eng yirik loyiha hisoblanadi.

Ikkinchi yirik yoʻnalish Yangiyer shahridagi muhandislik-kommunikatsiya infratuzilmasini yaxshilash bilan bogʻliq. Bobur mahallasida yakka tartibdagi uylar hamda koʻp qavatli turar joylarni qamrab oluvchi 10 kilometr oqava suv tarmogʻini yaxshilash ishlari uchun 2 milliard 613 million soʻm ajratildi.

Shuningdek, Shirin shahrida zamonaviy IT-markaz barpo etish uchun yana 2 milliard soʻm yoʻnaltirilmoqda.

Qoʻshimcha mablagʻlarning salmoqli qismi mahalla infratuzilmasini yaxshilashga ham sarflanadi. Guliston, Sardoba va Sirdaryo tumanlaridagi oltita mahalla binosini qurish va taʼmirlash ishlari uchun jami 4 milliard 336 million soʻm ajratildi.

Guliston tumanidagi ikkita mahalla binosiga 774 million soʻmdan, Sardoba va Sirdaryo tumanlaridagi toʻrtta mahallaga esa 697 million soʻmdan mablagʻ yoʻnaltirilgan.

Viloyat markazini obodonlashtirish ham eʼtibordan chetda qolmadi. Guliston shahrida koʻkalamzorlashtirish, hududlarni obodonlashtirish hamda koʻcha yoritish tizimini yaxshilash ishlari uchun 1 milliard soʻm ajratildi.

Bundan tashqari, viloyat hokimligining Qabullar uyini qoʻriqlash xizmati xarajatlarini moliyalashtirish uchun 796 million soʻm yoʻnaltirilmoqda. Yangiyer shahrida "Aqlli tuman" platformasi asosida vaziyatlar markazini tashkil etish ishlari uchun esa 500 million soʻm ajratilishi belgilandi.

Tahlil shuni koʻrsatadiki, qoʻshimcha daromadlarning asosiy qismi qurilish va taʼmirlash loyihalariga yoʻnaltirilmoqda. Xususan, Sogʻliqni saqlash boshqarmasi binosi, IT-markaz hamda oltita mahalla binosi boʻyicha barcha ishlar viloyat hokimligi huzuridagi "Yagona buyurtmachi xizmati" davlat muassasasi orqali amalga oshiriladi. Ushbu tashkilot zimmasiga yuklatilgan loyihalarning umumiy qiymati 12 milliard 336 million soʻmni tashkil etib, bu barcha ajratilgan mablagʻlarning qariyb 72 foiziga teng.

Qaror bilan mablagʻlardan foydalanish ustidan nazoratning bir necha bosqichli tizimi ham belgilandi. Mablagʻ oluvchi tashkilotlar har chorak yakunida bajarilgan ishlar yuzasidan hisobot, foto va videomateriallarni taqdim etishi lozim. Zarurat tugʻilganda deputatlarning doimiy komissiyasi obʼektlarga chiqib, mablagʻlardan foydalanish samaradorligini oʻrganadi.

Shuningdek, amalga oshirilgan ishlar haqidagi maʼlumotlar viloyat hokimligining rasmiy veb-saytida eʼlon qilinishi ham belgilangan.

Qaror mazmunidan koʻrinadiki, qoʻshimcha byudjet daromadlari, avvalo, ijtimoiy va kommunal infratuzilmani yaxshilashga yoʻnaltirilmoqda.