Alifboga tuzatishlar biror ortiqcha xarajatga olib kelmaydigan tarzda oʻtkaziladi — ekspert
Qonunchilik palatasi qabul qilgan alifboga tuzatishlar haqidagi qonun loyihasi qizgʻin muhokamalarga sabab boʻldi. Ekspert Shahnoza Soatova bu masala yuzasidan oʻz munosabatini bildirdi.
Qonun loyihasi toʻgʻrisida tarqatilgan maʼlumotlarda hamda keyinchalik mutaxassislar bergan tushuntirishlarda ham ushbu tuzatishlar tufayli shoshilinch xarajatlarga yoʻl qoʻyilmasligi koʻrsatib oʻtilgan edi.
Jumladan, qanchalik murakkab boʻlmasin, har qanday rasmiy hujjat, davlat belgilari, darslik va boshqalar toki ular oʻz muddati kelib almashmaguncha oʻz kuchida qolishi, barcha oʻzgartirishlar bosqichma-bosqich amalga oshirilishi taʼkidlanmoqda.
Koʻp tasdiqlanmagan xabarlar, jumladan, ismlar yozilgan avtoraqamlar chiqarilishi bahonasida alifbo tuzatilayotganligi yoki shu kabi oʻzgarishlar tufayli alifbo almashishidan kimningdir manfaatdorligiga oid fikrlar hech qanday asosga ega emas.
Aslida, koʻp sonli tilshunoslik va turdosh sohalar mutaxassislari taʼkidlaganidek, alifbomiz va tilimiz bugungi raqamli zamonda rivojlanishi uchun taklif etilayotgan oʻzgartirishlarga ehtiyoj allaqachon yetilib boʻldi.
Shu bois, alifboga kiritilayotgan oʻzgartirishlar biror ortiqcha xarajatlarga yoki boshqa sohalardagi islohotlarga bogʻliq emas, balki sohani rivojlantirish borasidagi tadrijiy qadam sifatida koʻrilishi kerak.
