Toshkent viloyatidagi bogʻchalarda ommaviy zaharlanish boʻyicha sud hukmi oʻqildi
Aybdorlarga 3 yildan 3,5 yilgacha qamoq va ozodlik cheklash jazolari ham qoʻllanilgan.
2025 yil sentabr oyida Toshkent viloyati bogʻchalarida kuzatilgan bolalarning ommaviy zaharlanishi yuzasidan sud jarayoni yakuniga yetdi.
Jinoyat ishlari boʻyicha Boʻka tuman sudi 11 nafar sudlanuvchini Jinoyat kodeksining 257-1-moddasi (sanitariyaga oid qonunchilikni yoki epidemiyaga qarshi kurash qoidalarini buzish) 1-qismi bilan aybli deb topdi.
Sud hukmi bilan, quyidagi shaxslar 3,5 yil muddatga ozodlikdan mahrum qilindi:
R.O. (erkak, 1985 yilda Toshkent viloyatida tugʻilgan, “Shark Milk Product” MChJ direktori)
A.S. (erkak, 1987 yilda Qashqadaryo viloyatida tugʻilgan, “Shark Milk Product” MChJ bosh texnologi)
R.X. (erkak, 1982 yilda Toshkent viloyatida tugʻilgan, “Shark Milk Product” MChJ texnologi).
Quyidagi shaxslar 3 yil muddatga ozodlikdan mahrum qilindi:
S.S. (erkak, 1985 yilda Toshkent viloyatida tugʻilgan, “Shark Milk Product” MChJ taʼsischisi va sotuv boʻlimi menejeri)
F.O. (erkak, 1990 yilda Toshkent viloyatida tugʻilgan, “Shark Milk Product” MChJ taʼsischisi va direktori oʻrinbosari)
M.N. (erkak, 1991 yilda Toshkent viloyatida tugʻilgan, “Shark Milk Product” MChJ texnologi yordamchisi)
Quyidagi shaxslarga 3 yil muddatga ozodlikni cheklash jazosi tayinlandi:
J.X. (erkak, 1993 yilda Buxoro viloyatida tugʻilgan, “Governess Business” MChJ direktori)
I.S. (erkak, 2000 yilda Sirdaryo viloyatida tugʻilgan, “Innavation Outsourcing Servise” MChJ direktori)
B.R. (erkak, 1992 yilda Sirdaryo viloyatida tugʻilgan, “Nishon invest” MChJ direktori)
F.D. (erkak, 1993 yilda Toshkent viloyatida tugʻilgan, “Kinder Garden Group” MChJ direktori)
D.Q. (ayol, 1997 yilda Toshkent viloyatida tugʻilgan, “Shark Milk Product” MChJ laboranti).
Sud hukmi bilan sudlanuvchilarga Jinoyat kodeksining 45-moddasiga asosan muayyan huquqdan mahrum qilish belgilandi.
Birinchi instansiya sudining hukmi ustidan shikoyat berilishi yoki protest keltirilishi mumkin.
Eslatib oʻtamiz, 2025 yil 26 sentabr kuni Boʻka, Piskent, Oqqoʻrgʻon, Quyi Chirchiq, Bekobod tumanlari, Nurafshon va Olmaliq shahridagi bir qator maktabgacha taʼlim muassasalarida jami 2 mingga yaqin tarbiyalanuvchining ommaviy zaharlanishi roʻy bergandi.
