Kambagʻallikni qisqartirish va bandlik boshqarmasi inspektori ushlandi
U fuqaroni Respublika ixtisoslashtirilgan Ona va bola salomatligi ilmiy-amaliy tibbiyot markazining hududiy filialiga ishga kiritish evaziga 800 dollar olgan.
Qashqadaryo viloyatida fuqaroni ishga kiritib qoʻymoqchi boʻlgan davlat mehnat huquq inspektori fosh etildi.
Bosh prokuratura huzuridagi Departamentning Qarshi tumani boʻlimi tomonidan tergovga qadar tekshirish oʻtkazildi.
Unda Qashqadaryo viloyati Kambagʻallikni qisqartirish va bandlik boshqarmasi davlat mehnat huquq inspektori A.H. (muqaddam sudlangan) oʻzining yuqori lavozimlarda ishlovchi tanishlari orqali fuqaro N.H.ni Qarshi shahridagi Respublika ixtisoslashtirilgan Ona va bola salomatligi ilmiy-amaliy tibbiyot markazining hududiy filialiga orastabon vazifasiga ishga kiritib qoʻyishi evaziga 800 AQSh dollarini firibgarlik yoʻli bilan olganligi aniqlangan. Soʻngra ushbu pullar hisobidan 200 AQSh dollari va 3,3 mln soʻmning qaytarilishi protsessual tartibda rasmiylashtirilgan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qoʻzgʻatilib, tergov harakatlari oʻtkazilmoqda.
