Kadastr agentligi Yashnobod tuman boʻlimi mansabdori qoʻlga olindi
Andijonda 40 sotix yerni rasmiylashtirish evaziga 160 ming AQSh dollari talab qilgan fuqaro ham ushlandi.
Toshkentda pora olgan kadastr bosh inspektori, Andijonda yer maydonini noqonuniy sotgan fuqaro ushlandi.
DXX “Koll-markazi”ga kelib tushgan murojaat asosida Xizmatning Toshkent shahar boʻyicha boshqarmasi va Iqtisodiy jinoyatlarga qarshi kurashish departamenti hamkorligida tezkor tadbir oʻtkazildi.
Unda Kadastr agentligining Yashnobod tuman boʻlimi bosh inspektori uchinchi shaxs orqali 2 ming AQSh dollari olgan vaqtida uning noqonuniy harakatiga chek qoʻyildi.
Bosh inspektor oʻz xizmat mavqeidan foydalangan holda, mahalliy fuqaro tomonidan noqonuniy oʻrnatilgan yengil konstruksiyali qurilmalarni buzib tashlamaslik va unga nisbatan jarima qoʻllamaslik evaziga ushbu pul mablagʻini talab qilgan.
Andijon shahrida yashovchi, 1984 y.t. fuqaro xaridorga Andijon tumani Xakan sanoat hududida joylashgan va davlat zaxirasida boʻlgan 40 sotix yer maydonini goʻyoki "E-auksion" orqali yutib olganligini aytib, kelgusida kadastr tizimidagi tanishlari orqali uning nomiga rasmiylashtirib berish evaziga 160 ming AQSh dollari talab qilgan.
DXX, IIB va IJQKD xodimlari hamkorligida oʻtkazilgan tezkor tadbirda u oldindan 80 ming AQSh dollari olgan vaqtida ushlandi.
Hozirda har ikki holat boʻyicha jinoyat ishlari qoʻzgʻatilib, tergov harakatlari olib borilmoqda.
