Gaz taʼminoti mansabdori va kadastr boʻlimi boshligʻi ushlandi
“Urguttumangaz” gaz taʼminoti boʻlimining mansabdor xodimi va mazkur tashkilotda muqaddam ishlagan shaxs oʻzaro til biriktirib, 2 ming dollar pora olgan.
Davlat xavfsizlik xizmati hamda Iqtisodiy jinoyatlarga qarshi kurashish departamenti tomonidan Samarqand va Qashqadaryo viloyatlarida korrupsion holatlarga chek qoʻyildi.
Xususan, “Urguttumangaz” gaz taʼminoti boʻlimining mansabdor xodimi va mazkur tashkilotda muqaddam ishlagan shaxs oʻzaro til biriktirib, mahalliy MChJga qarashli ishlab chiqarish sexiga yangi tabiiy gaz taqsimlash uskunasi oʻrnatish boʻyicha loyiha hujjatlarini rasmiylashtirish va texnik shart ruxsatnomasini olib berishni aytib, evaziga 2 ming AQSh dollari talab qilishgan.
Oʻtkazilgan tezkor tadbir davomida ular soʻralgan pul mablagʻini olgan vaqtlarida ashyoviy dalillar bilan ushlandi.
Boshqa holatda esa Kadastr agentligining Qashqadaryo viloyati tumanlaridan biridagi boʻlimi boshligʻi mahalliy fuqaroga issiqxona qurish uchun ajratilgan 50 sotix sugʻoriladigan yer maydonini boshqa shaxs nomiga kadastr hujjatlarini tayyorlab, sotib olib berish evaziga muqaddam 11600 AQSh dollari olgan.
Ammo, mazkur mansabdor shaxs bergan vaʼdasini bajarmay, olgan pul mablagʻi hisobidan 49,7 mln soʻmni qaytarib bergan vaqtida uning noqonuniy harakati fosh etildi.
Tergovga qadar tekshiruv davomida, u 11600 AQSh dollari hisobidan qolgan 89,5 mln soʻmni ham jabrlanuvchiga qaytarib berdi.
Hozirda har ikki holat boʻyicha jinoyat ishlari qoʻzgʻatilib, tergov harakatlari olib borilmoqda.
