Shikoyatni shikoyat qilinayotgan shaxsning oʻziga yuborish mumkin emas
Davlat organlari va tashkilotlari tomonidan fuqarolar murojaatlarini koʻrib chiqishda kamchiliklar koʻrsatib oʻtildi.
Prezident xalq qabulxonasi murojaatlar bilan ishlashdagi kamchiliklarni sanab oʻtdi.
Davlat organlari va tashkilotlari tomonidan fuqarolar murojaatlarini koʻrib chiqishda kamchiliklar kuzatilmoqda.
Murojaatni vakolatli organga oʻz vaqtida yuborish
“Jismoniy va yuridik shaxslarning murojaatlari toʻgʻrisida”gi Qonunning 25-moddasi ikkinchi qismiga koʻra, agar murojaatni koʻrib chiqish davlat organi yoki tashkilot vakolatiga kirmasa, u 5 kun ichida tegishli organ yoki mansabdor shaxsga yuborilishi hamda bu haqda murojaatchiga yozma yoki elektron shaklda xabar berilishi shart.
Amalda esa ayrim hollarda muddat buzilmoqda.
Shikoyatni shikoyat qilinayotgan shaxsning oʻziga yuborish mumkin emas
Qonunning 25-moddasi uchinchi qismiga asosan, murojaatni qarori yoki harakati (harakatsizligi) ustidan shikoyat qilinayotgan organ, tashkilot yoki mansabdor shaxsning oʻziga koʻrib chiqish uchun yuborish taqiqlanadi.
Afsuski, ayrim holatlarda murojaatchining shikoyati yana aynan shikoyat qilingan rahbarning oʻziga yuborilmoqda. Bu esa fuqarolarning haqli eʼtirozlariga sabab boʻlmoqda.
Prezident Xalq qabulxonasiga kelib tushgan bunday murojaatlar qonunchilikka muvofiq respublika darajasidagi vakolatli tashkilot tomonidan koʻrib chiqilishi lozim. Ularni shikoyat qilinayotgan quyi tashkilotga yuborish qonun talablariga zid hisoblanadi.
Murojaatga asosli javob berilishi shart
Qonunning 27-moddasi beshinchi qismiga koʻra, murojaatga berilgan javobda murojaatda koʻtarilgan har bir masala yuzasidan aniq va asoslantirilgan xulosalar, zaruratga qarab esa qonunchilik hujjatlariga havolalar keltirilishi lozim.
Biroq ayrim javoblarda ushbu talabga toʻliq rioya qilinmayapti.
Qonunchilik talablariga rioya qilmaslik belgilangan tartibda javobgarlikka sabab boʻladi.
