Iyul oyi uchun taxminiy ob-havo maʼlumoti taqdim etildi
Ushbu oyda oʻrtacha harorat meʼyoriy qiymatlardan 1,5-2 darajaga, janubda 2-2,5 darajaga, shimolda va choʻl hududlarda 2,5-3 darajaga yuqori boʻlishi kutiladi.
Bu yil yoz faslining oʻrtasi qanday boʻladi?
"Oʻzgidromet" prognoziga koʻra, iyul oyining boshi juda issiq boʻlmaydi.
1-5 iyul kunlari kunduzgi havo harorati 30-35 daraja atrofida, janubda 36-39 darajagacha qulay boʻlishi kutilmoqda. Keyinchalik harorat koʻtarila boshlaydi va birinchi oʻn kunlikning oxiriga kelib, kunduzi havo 37-40 darajagacha, janubda 41-43 darajagacha isiydi.
Keyinchalik oyning oxirigacha havo harorati 33-38 darajadan 38-43 darajagacha, respublika shimolida, choʻl hududlarida va janubida baʼzi joylarda 45 darajagacha oʻzgarib turishi kutilmoqda.
Harorat asosan kechalari 20-25 daraja, janubda 25-27 daraja, shimolda va choʻl hududlarda 27-30 daraja boʻladi.
Iyul oyida oʻrtacha harorat meʼyoriy qiymatlardan 1,5-2 darajaga, janubda 2-2,5 darajaga, shimolda va choʻl hududlarda 2,5-3 darajaga yuqori boʻlishi kutilmoqda.
Iyul oyi davomida respublika boʻyicha asosan yogʻingarchiliksiz ob-havo boʻlishi kutilmoqda, faqat ayrim kunlarda respublikaning baʼzi joylarida, asosan togʻ oldi va togʻli hududlarda, mahalliy xususiyatga ega boʻlgan qisqa muddatli yomgʻir yogʻishi va momaqaldiroq boʻlishi mumkin.
Iyul oyida oylik yogʻingarchilik miqdori meʼyordan kam boʻlishi taxmin qilinmoqda.
