“Odamlar turmushini yaxshilashga qaratilgan oʻzgarishlar oʻn yillab choʻzilmasligi kerak” — Saida Mirziyoyeva

Prezident Administratsiyasi rahbari Saida Mirziyoyeva 24 iyun kuni Andijon viloyatida zudlik bilan eʼtibor qaratilib, yangilanishi talab etilayotgan bir nechta ijtimoiy obʼektlarga tashrif buyurdi.

Jumladan, Oltinkoʻl tumanidagi “Koʻmakay” oilaviy poliklinikasi binosidan 1988 yildan buyon foydalanib kelinmoqda. U bugungi kun tibbiyot standartlaridan ancha orqada qolgan.

Tashrif davomida 9-sonli bogʻcha va 36-sonli maktabda ham koʻzdan kechirildi. Bogʻcha 1970 yillarda qurilgan oromgoh oʻrnida joylashgan. Maktab binosi undan ham eski — 1960 yilda barpo etilgan boʻlib, sigʻimi oʻquvchilar soniga mos kelmaydi. Shu sababli, har ikki obʼekt yangidan quriladi.

“Gap tibbiyot va taʼlim haqida ketar ekan, shifokor va oʻqituvchining ish joyi, yaratilgan sharoit, farzandini maktab yoki bogʻchaga kuzatayotgan ota-onaning koʻngli toʻq boʻlishi — eng muhim, birinchi galdagi masaladir. Odamlar turmushini yaxshilashga qaratilgan oʻzgarishlar oʻn yillab choʻzilmasligi kerak. Jarayonni tezlashtirish, aniq va sezilarli natija tez fursatda amalda koʻrinishi lozim”, — deya taʼkidladi Saida Mirziyoyeva.