Fargʻona va Jizzaxda elektr korxonasi muhandislari qoʻlga olindi
Bir holatda muhandis qurilish mahsulotlari ishlab chiqarish sexiga elektr tortish, hisoblagich oʻrnatib, ulab berish, shuningdek, mansabdor tanishlari orqali ruxsat beruvchi hujjatlarni tayyorlatib berish evaziga 100 mln soʻm talab qilgan.
Muhandislarning noqonuniy harakatlari fosh etildi.
Fargʻona tumani elektr taʼminoti korxonasi muhandisi xizmat mavqeidan foydalanib, fuqaroning qurilish mahsulotlari ishlab chiqarish sexiga elektr tarmogʻi tortish, elektr hisoblagich oʻrnatib, ulab berish, shuningdek, mansabdor tanishlari orqali ruxsat beruvchi hujjatlarni tayyorlatib berish evaziga 100 mln soʻm talab qiladi.
DXX Fargʻona viloyati boʻyicha boshqarmasi va IJQKD xodimlari hamkorligida oʻtkazilgan tezkor tadbirda muqaddam sudlangan muhandis soʻralgan pul mablagʻini olgan vaqtida ashyoviy dalillar bilan ushlandi.
Boshqa holatda esa Sharof Rashidov tumani elektr taʼminoti korxonasi muhandisi ham oʻz xizmat mavqeidan foydalanib, mahalliy fermer xoʻjalikning elektr energiyasidan mavjud 122 mln soʻm qarzdorligini mansabdor tanishlari orqali yoʻq qilib berish evaziga 50 mln soʻm talab qilib, muqaddam 10 mln soʻm olgan.
DXX va IJQKD xodimlari hamkorligida oʻtkazilgan tezkor tadbirda u qolgan 40 mln soʻmni olgan vaqtida ushlandi.
Hozirda har ikki holat boʻyicha muhandislarga nisbatan jinoyat ishlari qoʻzgʻatilib, tergov harakatlari olib borilmoqda.
