Germaniya prezidenti Oʻzbekistonga keldi
Muzokaralar davomida bir qator yangi qoʻshma loyihalar va dasturlarni ishga tushirish rejalashtirilgan.
Oʻzbekiston Prezidenti Shavkat Mirziyoyevning taklifiga binoan Germaniya Federativ Respublikasi Prezidenti Frank-Valter Shtaynmayer rafiqasi bilan rasmiy tashrif bilan mamlakatimizga keldi.
"Toshkent-Humo" xalqaro aeroportida oliy martabali mehmonni bosh vazirning oʻrinbosari Ochilboy Ramatov va boshqa rasmiy shaxslar kutib oldi.
Tashrif dasturiga muvofiq, ikki davlat rahbarlari oʻrtasida tor va kengaytirilgan tarkibda muzokaralar boʻlib oʻtadi. Oʻzbekiston-Germaniya koʻp qirrali munosabatlarini yanada chuqurlashtirish masalalari muhokama qilinadi.
Tomonlar savdo, sanoat kooperatsiyasi, energetika va yashil texnologiyalar, transport va logistika, farmatsevtika va kimyo sanoati, qishloq xoʻjaligi sohalarida amaliy hamkorlikni kengaytirishga, taʼlim va gumanitar almashinuvlarni faollashtirishga alohida eʼtibor qaratadilar.
Shuningdek, xalqaro va mintaqaviy kun tartibidagi dolzarb masalalar boʻyicha fikr almashiladi.
Muzokaralar davomida bir qator yangi qoʻshma loyihalar va dasturlarni ishga tushirish rejalashtirilgan.
