Toshkentda IIO boʻlinma boshligʻi pora bilan ushlandi
U tadbirkorga nisbatan qoʻzgʻatilgan jinoyat ishini tugatib berish evaziga jami 7,5 ming dollar soʻragan.
Toshkentda IIO boʻlinma boshligʻiga nisbatan jinoyat ishi qoʻzgʻatildi.
Korrupsiyaga qarshi kurashish yoʻnalishida Davlat xavfsizlik xizmati, IIV Shaxsiy xavfsizlik Bosh boshqarmasi va Toshkent shahar prokuraturasi hamkorligida tezkor tadbir oʻtkazildi.
Jumladan, Shayxontohur tumani IIO FMB TQX Jinoyat qidiruv boʻlimi boʻlinma boshligʻi oʻzining mansabdor tanishlari orqali tadbirkorlik faoliyati bilan shugʻullanuvchi shaxsga nisbatan Jinoyat Kodeksining 168-moddasi (firibgarlik) bilan qoʻzgʻatilgan jinoyat ishini ijobiy hal qilish evaziga 7 ming AQSh dollari va unga tegishli restoranda sodir boʻlgan yongʻin oqibatida mazkur muassasa ishchisining kuyish jarohati olganligi yuzasidan qoʻzgʻatilgan jinoyat ishini tugatib berish uchun 500 AQSh dollari, jami 7,5 ming AQSh dollari talab qilgan.
Oʻtkazilgan tezkor tadbirda mansabdor shaxs oldindan 2,5 ming AQSh dollari olgan vaqtida ashyoviy dalillar bilan ushlandi.
Hozirda unga nisbatan jinoyat ishi qoʻzgʻatilib, tergov harakatlari olib borilmoqda.
