Tahlil: Toshkentda uy-joy ijarasi takliflari kamaydi

Toshkent uy-joy ijara bozori tahlil qilindi.

Vazirlar Mahkamasi huzuridagi Makroiqtisodiy va hududiy tadqiqotlar instituti (MHTI) tomonidan 2026 yilning may oyida Toshkent shahridagi uy-joy ijara bozori tahlil qilindi.

Umumiy median ijara narxi 550 AQSh dollari darajasida saqlanib qoldi.

2026 yil may oyida Toshkent shahrida uy-joy ijarasining umumiy median narxi 550 dollarni tashkil etdi. Bu aprel oyidagi koʻrsatkich bilan bir xil, 2025 yil may oyidagiga nisbatan esa 10% yuqori.

Ijara takliflari soni sezilarli darajada qisqardi.

May oyida ijara eʼlonlari soni 18,1 mingtaga tushdi. Bu aprel oyidagi 22,8 mingta eʼlonga nisbatan qariyb 21% kam:

- 2026 yil yanvar–mart: 22,6 mingta (oʻrtacha)

- 2026-yil aprel: 22,8 mingta

- 2026-yil may: 18,1 mingta

Taklif hajmi boʻyicha Mirzo Ulugʻbek tumani yetakchi.

Eʼlonlarning eng katta qismi uchta tumanda jamlangan:

- Mirzo Ulugʻbek: 16,9%

- Mirobod: 12,9%

- Yunusobod: 12,6%

Top 3 ta tuman jami takliflarning 42,4%ini qamrab oldi.

Eng yuqori ijara narxlari Mirobod, Shayxontohur va Yakkasaroyda shakllanmoqda.

Toshkent ijara bozorida hudud omili narxga sezilarli taʼsir qilmoqda. Ayniqsa 3 xonali va 4+ xonali uy-joylar boʻyicha qimmat va arzon hududlar oʻrtasidagi tafovut 2 barobardan yuqori.

Xonalar soni boʻyicha eng qimmat va nisbatan arzon hududlar:

- 1 xonali: Mirobodda 600 dollar, Olmazor, Sergeli va Uchtepada 350 dollar

- 2 xonali: Mirobod va Shayxontohurda 700 dollar, Sergeli va Uchtepada 400 dollar

-3 xonali: Mirobod va Shayxontohurda 1000 dollar, Sergeli va Uchtepada 450 dollar

- 4+ xonali: Mirobodda 1150 dollar, Yakkasaroyda 1100 dollar, nisbatan arzon hududlarda 500-550 dollar.

Bozorning asosiy segmenti 2 xonali xonadonlar boʻlib qolmoqda.

May oyida ijara eʼlonlarining 86%ga yaqini 2 va 3 xonali xonadonlar hissasiga toʻgʻri keldi.

- 2 xonali xonadonlar: 59,6%

- 3 xonali xonadonlar: 26,0%

- 1 xonali xonadonlar: 10,9%

- 4+ xonali xonadonlar: 3,5%

Xonalar kesimida narx dinamikasi turlicha shakllandi.

- 1 xonali: 400 dollar, yillik oʻsish 14,3%

- 2 xonali: 500 dollar, yillik oʻzgarish 0,0%

- 3 xonali: 700 dollar, yillik oʻzgarish 0,0%

- 4+ xonali: 800 dollar, yillik pasayish 20,0%

Xulosa: 2026 yil may oyida Toshkent ijara bozorida umumiy median narx barqaror saqlanib qoldi. Biroq hududlar va xonalar soni kesimida tafovut yuqoriligicha qolmoqda. Bozor taklifi asosan 2 xonali xonadonlar atrofida jamlangan. 1 xonali xonadonlarda narxlarning yillik oʻsishi yuqori, 4+ xonali segmentda esa pasayish kuzatilmoqda.

Investorlar uchun: 1 xonali xonadonlar narxining yillik oʻsishi ushbu segmentda likvidlik nisbatan yuqori ekanini koʻrsatadi.

Ijarachilar uchun: 1 xonali xonadonlarda narx bosimi yuqoriroq. 4+ xonali xonadonlarda esa kelishuv imkoniyati kengroq boʻlishi mumkin.

Mulkdorlar uchun: ijara narxini belgilashda shahar boʻyicha umumiy medianaga emas, aniq tuman, xonalar soni va segmentdagi taklif hajmiga tayanish muhim.