Shavkat Mirziyoyev va Vladimir Putin Oʻzbekistondagi AES qurilishiga start berdilar

Sankt-Peterburg shahriga amaliy tashrif doirasida Oʻzbekiston Respublikasi Prezidenti Shavkat Mirziyoyev va Rossiya Federatsiyasi Prezidenti Vladimir Putinning uchrashuvi boʻlib oʻtdi.

Oʻzbekiston – Rossiya keng qamrovli strategik sheriklik va ittifoqchilik munosabatlarini yanada kengaytirish hamda mustahkamlash masalalari koʻrib chiqildi.

Savdo-iqtisodiy hamkorlik jadal rivojlanayotgani mamnuniyat bilan qayd etildi. Yil boshidan buyon tovar ayirboshlash hajmi 20 foizga oshdi.

Sanoat, energetika, metallurgiya, transport, kimyo sanoati va iqtisodiyotning boshqa ustuvor tarmoqlarida yirik loyihalarni amalga oshirish davom etmoqda.

Tovar ayirboshlashdagi joriy surʼatlarni saqlab qolish, kooperatsiya loyihalarini jadallashtirish hamda hududlar darajasidagi faol aloqalarni davom ettirish muhimligi taʼkidlandi.

Faol madaniy-gumanitar almashinuvlarni yanada kengaytirishga alohida eʼtibor qaratildi. Shu kunlarda Mariinskiy teatrida Georg Fridrix Gendelning “Tamerlano” operasining premerasi boʻlib oʻtgani hamda “Ermitaj” davlat muzeyida Oʻzbekiston amaliy sanʼati koʻrgazmasi ochilgani qayd etildi.

Yetakchilar boʻlajak tadbirlar rejasini ham muhokama qildilar.

Oʻzbekiston Respublikasi Prezidenti Shavkat Mirziyoyev va Rossiya Federatsiyasi Prezidenti Vladimir Putin Oʻzbekistonda integratsiyalashgan atom elektr stansiyasining birinchi energiya blokini qurish ishlariga start berdilar.

Marosimda telekoʻprik orqali Xalqaro atom energiyasi agentligi (XAEA) bosh direktori Rafael Grossi ham ishtirok etdi.

Davlatimiz rahbari Vladimir Putin va Rafael Grossiga ushbu loyihaning roʻyobga chiqarilishini shaxsan qoʻllab-quvvatlaganlari va koʻrsatilgan eʼtibor uchun minnatdorlik bildirdi. Mamlakatimizda birinchi atom elektr stansiyasini barpo etishda ishtirok etayotgan Oʻzbekiston va Rossiya mutaxassislariga birgalikdagi saʼy-harakatlar va yuksak professionallik uchun alohida tashakkur aytildi.

Mazkur loyihaning amalga oshirilishi Oʻzbekistonning texnologik, industrial va ilmiy taraqqiyotida yangi bosqichni boshlab berib, yangi tarmoq – atom energetikasini rivojlantirish uchun asos yaratishi qayd etildi. Loyiha kichik modulli atom generatsiyasi hamda yirik hajmli energetika sohasidagi eng soʻnggi yutuqlarni oʻzida mujassam etgan.

Oʻzbekiston yetakchisi xavfsizlik loyihaning mutlaq va soʻzsiz sharti ekanini alohida taʼkidladi. Stansiyani qurish va uni ekspluatatsiyaga tayyorlash ishlari eng zamonaviy xalqaro standartlar, ilgʻor muhandislik yechimlari asosida hamda Xalqaro atom energiyasi agentligining doimiy nazorati ostida bajarilmoqda.

Ushbu ulkan loyihaning amalga oshirilishi va uning natijalari Oʻzbekiston – Rossiya keng qamrovli strategik sheriklik va ittifoqchilik munosabatlarini yanada mustahkamlashga xizmat qilishiga ishonch bildirildi.