Belgiya Toshkentda elchixona ochadi

Belgiyaning nufuzli “Eureporter” va “Eureflect” nashrlarida Oʻzbekiston bilan ikki tomonlama hamkorlikning yangi rivojlanish bosqichiga bagʻishlangan “Belgiya Toshkentda elchixona ochmoqda” sarlavhali maqola eʼlon qilindi.

Maqolada yozilishicha, soʻnggi oʻn yillikda Oʻzbekiston va Belgiya oʻrtasidagi diplomatik va iqtisodiy hamkorlik sezilarli darajada rivojlandi. Belgiyaning Toshkentda elchixona ochish qarori shunchaki maʼmuriy qadam emas, balki Oʻzbekistonning Markaziy Osiyodagi geosiyosiy va iqtisodiy ahamiyatining ortishi va Yevropa bilan mintaqaviy strategik munosabatlarning kengayishidan dalolat beradi.

Belgiya Oʻzbekiston mustaqilligini 1991 yilda tan olgan va rasmiy diplomatik aloqalar 1992 yilda oʻrnatilgan. 1995 yildan beri Oʻzbekistonning Bryusselda elchixonasi faoliyat yuritib, Yevropa Ittifoqi va Belgiya bilan doimiy muloqotni taʼminlab kelmoqda. Yangi Toshkentda elchixona ochilishi ikki tomonlama munosabatlarda yangi bosqich va Oʻzbekistonning Markaziy Osiyodagi muhimligiga belgidir.

Prezident Shavkat Mirziyoyevning Yevropa bilan ochiq va diplomatik integratsiya siyosati Yevropa hukumatlari uchun Oʻzbekistonni strategik hamkor sifatida koʻrishga zamin yaratdi.

Shavkat Mirziyoyevning 2025 yilda Bryusselga tashrifi va qirol Filipp bilan uchrashuvi ikki davlat oʻrtasida savdo, sarmoya, logistika va infratuzilma sohalarida hamkorlikni mustahkamlash imkonini berdi.

Nashrlarda qayd etilishicha, parlamentlararo doʻstlik guruhlari va vazirlar darajasidagi aloqalar ikki mamlakatning siyosiy va iqtisodiy hamkorligini institutsional asosda mustahkamlaydi. Bu mexanizmlar savdo, turizm, taʼlim va gumanitar sohalarda hamkorlikni rivojlantirishga xizmat qiladi.

Ikki davlat oʻrtasidagi savdo hajmi 2020 yildagi 70 million dollardan 2024 yilda 212,7 million dollarga oshdi. Oʻzbekiston asosan sanoat mahsulotlari, oziq-ovqat va kimyo mahsulotlari eksport qiladi, Belgiyadan esa mashinalar, sanoat uskunalari, farmatsevtika va texnologik qismlar import qilinadi.