MobiUz aloqa kompaniyasi sotildi
Kompaniyaning qiymati 351 mln AQSh dollari darajasida baholangan boʻlib, telekommunikatsiya infratuzilmasini rivojlantirishga 500 mln AQSh dollarigacha investitsiya kiritish rejalashtirilgan.
MobiUz mobil aloqa kompaniyasi sotildi.
Davlat aktivlarini boshqarish agentligi “Universal Mobile Systems” MChJ (MobiUz) ustav kapitalidagi 100 foiz davlat ulushi sotilganini eʼlon qildi. Bu haqda Davaktiv xabar berdi.
AQShning “McKim and Company” kompaniyasi boshchiligidagi moliyaviy investorlar va sohaviy texnologik hamkor “JVR Enterprises LLC” ishtirokidagi konsorsium taklifi gʻolib deb topildi.
Qayd etilishicha, xususiylashtirish dasturlariga muvofiq tashkil etilgan jarayonda xalqaro investitsiya banki Rothschild & Co strategik maslahatchi, KPMG moliyaviy maslahatchi, Deloitte esa mustaqil baholovchi sifatida jalb etilgan.
Savdo jarayoni xalqaro bozorlarda keng targʻib qilingan. Maslahatchilarning global ofislari orqali 100 dan ortiq strategik va moliyaviy investor bilan individual muzokaralar oʻtkazilgan. Bitim haqidagi maʼlumotlar Bloomberg va Financial Times kabi xalqaro nashrlarda yoritilgan hamda investorlar uchun xalqaro road-show tadbirlari tashkil etilgan.
Ushbu taklifga muvofiq, MobiUz kompaniyasining qiymati 351 mln AQSh dollari darajasida baholangan boʻlib, telekommunikatsiya infratuzilmasini rivojlantirishga 500 mln AQSh dollarigacha investitsiya kiritish rejalashtirilgan.
Bitim kuchga kirishi uchun tegishli tartibga soluvchi organlarning ruxsatnomalarini olish, shuningdek, belgilangan korporativ va huquqiy tartib-taomillarni yakunlash talab etiladi.
