Samarqandda 4 kishi kanalda choʻkib ketdi
"Narpay" kanaliga tushib ketgan jami 8 fuqarodan 4 nafari aholi tomonidan qutqarib qolingan.
Samarqandda 4 kishi kanalda choʻkib ketdi.
Joriy yilning 31 may kuni Samarqand viloyati FVBga “112” tizimi orqali yuk tashish uchun moʻljallangan elektromoped haydovchisi boshqaruvni yoʻqotishi natijasida unda boʻlgan 8 nafar fuqaro bilan Paxtachi tumani “Ukrach” MFY hududidan oqib oʻtuvchi “Narpay” kanaliga tushib ketgani haqida xabar kelib tushgan.
Xabarga asosan, FVV qutqaruvchilari voqea joyiga yetib borgan vaqtda kanalga tushib ketgan 8 nafar fuqarodan 4 nafari aholi tomonidan qutqarib qolinganligi maʼlum boʻlgan.
Shundan soʻng zudlik bilan suvda keng koʻlamli qidiruv-qutqaruv ishlari olib borilgan. Qutqaruvchilar va aholi yordamida olib borilgan suvda qidiruv ishlari davomida qolgan 4 nafar fuqaro halok boʻlganligi aniqlanib, kanaldan olib chiqilgan.
Olib borilgan surishtiruv ishlari davomida aniqlanishicha, Paxtachi tumani “Ukrach” MFYda yashovchi, 1984-yilda tugʻilgan fuqaro oʻz boshqaruvidagi elektromopedga jami 8 nafar shaxsni – turmush oʻrtogʻi hamda oʻzi va qoʻshni xonadondan 6 nafar voyaga yetmagan bolalarni mindirib, sayr qilayotgan boʻlgan.
Hozirda voqea joyida Paxtachi tumani prokuraturasi, IIB, FVB tomonidan hodisaning kelib chiqish sabablarini oʻrganish ishlari olib borilmoqda, deyiladi xabarda.
