Oʻzbekistonda islomiy moliyalashtirish xizmatlari hajmi oʻsdi

Oʻzbekistonda islomiy moliyalashtirish xizmatlari hajmi oʻsdi. Bu haqda Markaziy bank sharhida aytiladi.

2026 yilning I choragida mikromoliya tashkilotlari tomonidan koʻrsatilgan islomiy moliyalashtirish xizmatlari hajmi 11,2 mlrd soʻmni tashkil etdi. Bu koʻrsatkich 2025 yilning mos davriga nisbatan qariyb 8 barobarga oshgan.

Koʻrsatilgan xizmatlarning asosiy qismini “Murobaha” shartnomasi tashkil etib, ularning hajmi 7,7 mlrd soʻmga yoki jami xizmatlarning 69 foiziga teng boʻldi. Shuningdek, “Muzoraba” xizmatlari 2,1 mlrd soʻmni (19 foiz), “Islomiy ijara” xizmatlari esa 1,4 mlrd soʻmni (12 foiz) tashkil etdi.

Mijozlar tarkibida yuridik shaxslar yetakchilik qilib, ular hissasiga 5,2 mlrd soʻmlik xizmatlar toʻgʻri keldi.

Jismoniy shaxslar va yakka tartibdagi tadbirkorlar ulushi mos ravishda 2,9 mlrd soʻm va 3,1 mlrd soʻmni tashkil etdi.

Hududlar kesimida xizmatlarning asosiy qismi Toshkent shahri hissasiga toʻgʻri kelib, bu yerda 10,6 mlrd soʻmlik islomiy moliyalashtirish xizmatlari koʻrsatildi. Namangan viloyatida esa ushbu koʻrsatkich 670 mln soʻmni tashkil etdi.

Natijalar islomiy moliyalashtirish xizmatlariga boʻlgan talab ortib borayotganini hamda mikromoliya bozorida ushbu yoʻnalish bosqichma-bosqich rivojlanayotganini koʻrsatmoqda.