Kinematografiya komissiyasi, Milliy va Badiiy kengashlar tugatiladi
Davlat buyurtmasi asosida yaratilgan filmlar namoyishidan tushgan mablagʻning 50 foizi prodyuser va ijodiy guruhga qoʻshimcha ragʻbat sifatida beriladi.
Respublika kinematografiya komissiyasi, Milliy va Badiiy kengashlar tugatiladi.
Shu yilning 1 sentabridan davlat buyurtmasi asosida kino yaratishda targʻibot va reklama xarajati uchun film budjetining 30 foizigacha mablagʻ ajratiladi, xarid shartnomalarini ekspertizadan oʻtkazish talabi bekor qilinadi. Shuningdek, xorijiy kompaniyalarning Oʻzbekiston hududida kino mahsulot yaratish bilan bogʻliq faoliyati soliqlardan ozod qilinadi.
Davlat buyurtmasi asosida yaratilgan filmlar namoyishidan tushgan mablagʻning 50 foizi prodyuser va ijodiy guruhga qoʻshimcha ragʻbat sifatida beriladi.
Oʻzbekiston kinoarboblari ijodiy uyushmasi tomonidan oʻtkaziladigan “Oltin humo” milliy kino taqdimotining nufuzini yangi bosqichga koʻtarish maqsadida har yili 5 milliard soʻmdan ajratiladi.
Respublika kinematografiya komissiyasi, Milliy va Badiiy kengashlar haligacha eskicha boshqaruv va samarasiz nazorat tizimidan voz kecha olmayotgani qayd etildi. Shu bois, sohada ijodiy erkinlik va sogʻlom raqobat muhitini rivojlantirish maqsadida ushbu komissiya va kengashlar faoliyati butunlay tugatiladi.
Endi kinoning har bir janri va mavzusidan kelib chiqib, oʻsha soha mutaxassislaridan iborat haq toʻlanadigan ekspert guruhlari tashkil qilinadi.
Bunda Oʻzbekiston kinoarboblari ijodiy uyushmasi, Yozuvchilar uyushmasi, Bastakorlar uyushmasi tomonidan tavsiya etilgan mutaxassislar ekspert guruhlari tarkibiga kiritiladi. Mutasaddilarga kino sohasida zamonaviy va shaffof tizimni yoʻlga qoʻyish boʻyicha taklif kiritish topshirildi.
