Suv nasosi ichiga yashirilgan narkotik modda fosh etildi
Qurilma xolislar ishtirokida tekshirilganda, uning ichiga “Alfa PVP” sintetik giyohvandlik vositasi yashirilganligi maʼlum boʻldi.
Suv nasosi ichiga yashirilgan narkotik modda fosh etildi.
Davlat xavfsizlik xizmati va Bojxona organlari xodimlari hamkorligida Toshkent viloyatining Zangiota tumanida tezkor tadbir oʻtkazildi. Unda oldindan kuzatuvga olingan, 1994 yilda Qoraqalpogʻiston Respublikasida tugʻilgan fuqaro ushlanib, undan xorijdan yuborilgan suv nasosi qurilmasi tegishli tartibda olib qoʻyildi.
Ushbu qurilma xolislar ishtirokida tekshirilganda, uning ichiga 968 gr “Alfa PVP” sintetik giyohvandlik vositasi yashirilganligi maʼlum boʻldi.
Shuningdek, mazkur fuqaro ijarada yashovchi Toshkent shahar Yangihayot tumanidagi xonadondan ham narkotik moddalarni oʻlchash va qadoqlashda foydalaniladigan 2 ta elektron torozi, “zip” paketlar hamda skotchlar olindi.
Aniqlanishicha, u internet narkodoʻkonda “omborchi” vazifasida ishlagan.
Hozirda unga nisbatan jinoyat ishi qoʻzgʻatilib, tergov harakatlari olib borilmoqda.
