Oʻzbekiston va Qozogʻiston savdo-iqtisodiy hamkorlik boʻyicha "yoʻl xaritasi"ni imzoladi
Avtomobilsozlik, energetika, kimyo sanoati, metallurgiya, farmatsevtika, logistika va boshqa sohalarda qoʻshma loyihalar amalga oshiriladi.
Ostonaga amaliy tashrif doirasida Oʻzbekiston Respublikasi Prezidenti Shavkat Mirziyoyev va Qozogʻiston Respublikasi Prezidenti Qosim-Joʻmart Toʻqayev huzurida Investitsiya va savdo sohalarida erishilgan kelishuvlarni amalga oshirish boʻyicha amaliy harakatlar rejasini imzolash marosimi boʻlib oʻtdi.
“Yoʻl xaritasi”da avtomobilsozlik, energetika, kimyo sanoati, metallurgiya, farmatsevtika, logistika, qurilish materiallari, uy-joy qurilishi, qishloq xoʻjaligi kabi tarmoqlarda qoʻshma loyihalarni amalga oshirish nazarda tutilgan.
Hujjat joriy yil aprel-may oylarida ikki davlat rahbarlarining Buxoro va Turkiston shaharlarida boʻlib oʻtgan uchrashuvlarida erishilgan kelishuvlarni amalga oshirishga qaratilgan.
