"Kristal Pelas" oʻz tarixida ilk bor yevrokuboklarda gʻolib chiqdi
London jamoasi Ispaniyaning "Rayo Valekano" klubini 1:0 hisobida magʻlub etdi.
Angliyaning "Kristal Pelas" jamoasi Yevropa Konferensiyalar Ligasida gʻolib boʻldi. Turnirning soʻnggi oʻyinida London jamoasi Ispaniyaning "Rayo Valekano" jamoasini 1:0 hisobida magʻlub etdi.
Uchrashuv Leypsigda boʻlib oʻtdi. Jan-Filipp Mateta 51-daqiqada yagona golni urdi.
Bu sovrin "Kristal Pelas"ning tarixidagi birinchi Yevropa musobaqasi sovrini boʻldi. Oliver Glasnerning jamoasi UYeFAning koʻp klubli egalik qoidalari tufayli Yevropa Ligasidan tushib ketganidan soʻng Konferensiya Ligasiga yoʻllanma oldi.
Oʻtgan mavsumda "Kristal Pelas" Angliya Kubogini qoʻlga kiritdi va dastlab Yevropa Ligasida oʻynashi kerak edi. Biroq, koʻp klubli egalik holati tufayli Fransiyaning "Lion" jamoasi turnirda ishtirok etish huquqiga ega boʻldi, London klubi esa Konferensiya Ligasiga tushib ketdi.
"Rayo Valekano" oʻzining birinchi Yevropa finalida oʻynagan edi. Ispaniya klubi oʻz tarixida hali yirik sovrinni qoʻlga kirita olmagan.
Glasner murabbiylik faoliyatidagi ikkinchi Yevropa sovrinini qoʻlga kiritdi. 2021/22 mavsumida avstriyalik mutaxassis "Ayntraxt Frankfurt"ni Yevropa Ligasi chempionligiga olib chiqdi.
Konferensiya Ligasi 2021 yilda tashkil etilgan. Musobaqaning gʻoliblari orasida "Roma", "Vest Xem", "Olimpiakos" va "Chelsi" bor.
