Trampning reytingi yana rekord darajada quladi
Amerikaliklarning Trampning iqtisodiy siyosatidan noroziligi eng sezilarli darajada oshgan.
Donald Trampning reytingi yana rekord darajada quyi pogʻonaga tushdi.
May oyining ikkinchi yarmida AQShda oʻtkazilgan soʻrovlar shuni koʻrsatdiki, Donald Trampning prezidentlik faoliyatini maʼqullaydiganlar soni yanada kamaydi.
Newsweek tomonidan eʼlon qilingan American Research Group soʻroviga koʻra, Trampning reytingi uning prezidentlik davridagi ikki muddati davomida eng past darajaga tushib ketgan. Respondentlarning 31 foizi Trampning faoliyatini maʼqullagan, 64 foizi esa maʼqullamagan. Aprel oyida bu koʻrsatkichlar mos ravishda 32% va 63% ni tashkil etdi.
CNN uchun oʻtkazilgan may oyidagi soʻrovga koʻra, respondentlarning 65 foizi Trampning faoliyatini maʼqullamasligini aytishgan, atigi 35 foizi esa maʼqullagan. Bu aprel oyiga nisbatan norozilikning bir foizga oshganini anglatadi.
Reuters/Ipsosʼning soʻnggi soʻrovi shuni koʻrsatadiki, respondentlarning 35 foizi Trampning faoliyatini maʼqullaydi, 63 foizi esa maʼqullamaydi.
Rekord darajadagi eng past koʻrsatkich - 34% ni qayd etgan aprel oyi bilan solishtirganda, amerikaliklarning prezidentni maʼqullashi oshdi. Biroq, Reuters agentligining taʼkidlashicha, Tramp ikkinchi muddatini 2025 yil yanvar oyida 42% maʼqullash reytingi bilan boshlagan.
The Economist ham shunga oʻxshash manzarani qayd etdi, unda respondentlarning 37 foizi Trampning may oyidagi faoliyatini maʼqullagan, 57 foizi esa maʼqul koʻrmaganligi taxmin qilingan.
Barcha soʻrovnomalarga koʻra, amerikaliklarning Trampning iqtisodiy siyosatidan noroziligi eng sezilarli darajada oshgan.
Respublikachi saylovchilar orasida Trampni qoʻllab-quvvatlash ham kamayib bormoqda. Reuters maʼlumotlariga koʻra, may oyida roʻyxatdan oʻtgan respublikachi saylovchilarning 79 foizi Trampning prezidentlik faoliyatini maʼqullaganini aytishgan, aprel oyida bu koʻrsatkich 82 foiz va uning ikkinchi muddati boshlanganida 91 foiz boʻlgan.
