Kinotavsiya: jangari, triller va yoqimli melodrama

“Kinotavsiya” loyihasining navbatdagi sonida oʻz davrida katta shuhrat qozongan turli janrdagi filmlarni saraladik. Ularning orasida jangari, triller va yoqimli melodrama ham bor.

5. “Kichkina odamlar”, 2007 (Oʻzbekiston)

Rejissyor Hotam Fayziyev tomonidan “Oʻzbekkino” milliy agentligining “Vatan” kinostudiyasida suratga olingan, chuqur ijtimoiy va falsafiy mavzulardagi oʻzbek dramasi.

Filmda oʻzbek kinosining mahoratli aktyorlari jamlangan: Poʻlat Saidqosimov, Alisher Uzoqov, Diyos Rahmatov, Rajab Adashev, Dilnoza Kubayeva, Tohir Saidov va Yayra Abdullayeva.

Film jamiyatdagi “kichik” (oddiy, sodda) insonlarning hayoti orqali mansabparastlik, boylikka ruju qoʻyish va oqibatsizlik kabi dolzarb illatlarni fosh etadi.

Syujet

Film yaxlit bitta syujetdan iborat emas, balki inson maʼnaviyati, vijdon va nafs kurashini ochib beruvchi 3 ta mustaqil qisqa metrajli hikoyadan (almanaxdan) tashkil topgan.

“Kutilmagan omad”: qishloqlik oddiy yigit Gʻoziboy toʻsatdan lotereyaga avtomobil yutib oladi. Koʻz ochib-yumguncha kelgan boylik yigitning xulqini buzadi. U oʻz otasi va akasiga yuqoridan, bepisandlik bilan qaray boshlaydi. Bu omad ularning oilaviy munosabatlari uchun juda qimmatga tushadi.Bosh rollarda: Alisher Uzoqov (Gʻoziboy) va Poʻlat Saidqosimov (Raimberdi ota).

“Hazil”: ijarada yashovchi Sodiq koʻchada mast holda uxlab yotgan doʻstini koʻrib, unga hazil qilmoqchi boʻladi va ustidagi tilla taqinchoqlarini yechib oladi. Doʻsti uygʻonib, tillalarini yoʻqotganini aytganida, Sodiq aybini tan olmay, ularni birga qidirishga vaʼda beradi.

Sodiq tillalarni qaytarishga ulgurmay, Qamchiq dovonida oʻz mashinasiga oʻtirgʻizib olgan notanish shaxslar tomonidan kutilmaganda oʻldiriladi. Tillalar esa keyinchalik militsiya xodimlari tomonidan topiladi. Bosh rolda: Muhammadjon Rahimov (Sodiq).

“Kichkina odamning “katta tanishi”: uzoq yillar qishloq maktabida dars bergan keksa oʻqituvchi Mixliboy aka nafaqaga chiqadi. Bir kuni uning sobiq oʻquvchilaridan biri – Xolboy shaharda katta amaldor boʻlib ketgani haqida xabar tarqaladi.

Qishloq ahli Mixliboy akaga oʻz muammolari yozilgan xatlarni va sovgʻa-salomlarni berib, Xolboyning oldiga yordam soʻrab joʻnatishadi. Ammo katta kursiga oʻtirgan shogird oʻz ustozini tanishni ham xohlamaydi, uni rad etadi. Bosh rollarda: Diyos Rahmatov (Mixliboy aka), Matyoqub Matchonov (Xolboy).

4. “Piter FM”, 2006 (Rossiya)

Rejissyor Oksana Bichkova tomonidan suratga olingan, Sankt-Peterburg shahrining goʻzal manzaralari va romantik muhiti tasvirlangan Rossiya lirik komediyasi va melodramasi. Film chiqqan davrida yoshlarning sevimli kinosiga aylanib, oʻziga xos madaniy ramz darajasiga koʻtarilgan.

Kinodagi “Hammasi yaxshi boʻladi. Men surishtirib koʻrdim” («Vse budet xorosho. Ya uznavala”) iborasi xalq orasida juda mashhur memga aylangan.

Sankt-Peterburg shahri filmda shunchaki dekoratsiya emas, balki asosiy qahramonlardan biri sifatida gavdalanadi. Unda koʻchalar, tomlar, Nevskiy prospekti va daryo boʻylari juda goʻzal tasvirlangan.

Film musiqalari ham katta muvaffaqiyat qozongan. Kartinada “Gorod 312” (Vne zonы dostupa), “Krec” (Nejnost) va “Marksheyder Kunst” guruhlarining qoʻshiqlari yangraydi.

Mashhur aktyorlar: epizodlarda Vladimir Mashkov, Andrey Krasko va Aleksandr Bashirov kabi taniqli yulduzlar ham koʻrinish bergan.

Syujet

Film bir-birini umuman tanimaydigan ikki yosh insonning taqdiri haqida: Masha (Yekaterina Fedulova) – mashhur radiostansiyada didjey boʻlib ishlaydi. U sobiq sinfdoshi Kostyaga turmushga chiqish arafasida, ammo yuragi tubida bu qarori toʻgʻriligiga shubha qiladi.

Maksim (Yevgeniy Siganov) – isteʼdodli yosh arxitektor. U xalqaro tanlovda gʻolib chiqib, Germaniyaga ishga taklif qilingan, ammo shaharni va sobiq sevgilisini tashlab ketishga ikkilanadi.

Kunlardan bir kun Masha koʻchada uyali telefonini tushirib qoʻyadi, uni Maksim topib oladi. Ular telefon orqali gaplasha boshlaydilar va bir-birlariga bogʻlanib qolishadi. Lekin taqdir yoki shaharning kattaligi ularning koʻrishishiga qayta-qayta xalaqit beradi.

3. “Balerina”, 2025 (AQSh)

Mazkur film mashhur “Jon Uik” franshizasining ilk toʻliq metrajli spin-offi (yondosh filmi) hisoblanadi. Film dunyo kinoteatrlarida va Oʻzbekiston katta ekranlarida 2025 yilning iyun oyida namoyish etilgan.

Rejissyor: Len Uayzman. Bosh rollarda: Ana de Armas, Kianu Rivz, Anjelika Xyuston, Gebriyel Birn, Lens Reddik, Katalina Sandino Moreno, Norman Ridus, Yan Maksheyn.

Filmda Jon Uik rolida Kianu Rivzning oʻzi ham koʻrinish beradi va u bosh qahramon Yevaga xavfli vaziyatlarda koʻmaklashadi. Kino “Jon Uik” uslubidagi oʻta shiddatli va vizual goʻzal jang sahnalari (Gan-fu) bilan ajralib turadi.

Filmda Nyu-Yorkdagi “Kontinental” mehmonxonasi boshqaruvchisi Uinston (Yan Maksheyn) va Xaron (marhum aktyor Lens Reddikning soʻnggi rollaridan biri) ham ishtirok etgan.

Syujet

Voqealar xronologik jihatdan “Jon Uik-3” va “Jon Uik-4” filmlari oraligʻida boʻlib oʻtadi. Bolaligida otasining oʻldirilishiga guvoh boʻlgan Yeva qasos oʻtida yonadi. U professional balet maktabi niqobi ostidagi maxfiy qotillik akademiyasida tahsil olib, oʻz oilasini yoʻq qilgan qudratli klanga qarshi urush ochadi.

2. “Qil ustida”, 1997 (AQSh)

Rejissyor Li Tamaxori tomonidan suratga olingan mazkur sarguzasht trillerda bosh rollarni Entoni Xopkins va Alek Bolduin ijro etgan.

Charlzning mashhur iborasi bor: “Koʻpchilik oʻrmonda baxtsiz hodisa tufayli emas, balki qoʻrquv va umidsizlikdan vafot etadi”.

Syujet

Milliarder Charlz Mors (Xopkins), moda fotografi Robert Grin (Bolduin) va uning yordamchisi Stiven kichik samolyotda Alyaskaning kimsasiz, qahraton oʻrmonlariga qulashadi. Samolyot uchuvchisi halok boʻladi.

Shahar hayotiga oʻrgangan qahramonlar yovvoyi tabiat qoʻynida, hech qanday qurol va oziq-ovqatsiz qolishadi. Ularni qadamba-qadam taʼqib qilib yuruvchi xavfli odamxoʻr ayiq esa vaziyatni yanada ogʻirlashtiradi.

Tez orada Charlz xotini Elli va fotograf Robert oʻrtasida yashirin ishqiy munosabatlar borligini tushunib yetadi. Endi ular nafaqat ayiqdan omon qolishlari, balki bir-birlariga boʻlgan ishonchsizlik va adovatni ham yengishlari kerak boʻladi.

1. “Interstellar”, 2014 (AQSh)

Rejissyor Kristofer Nolan tomonidan suratga olingan, ilmiy-fantastika janridagi dunyo kinosining haqiqiy shohasari. Film nafaqat vizual effektlari va musiqasi, balki koinot qonuniyatlarining ilmiy jihatdan aniq tasvirlangani bilan ham ajralib turadi.

Film ssenariysi ustida mashhur fizik-nazariyotchi, Nobel mukofoti sovrindori Kip Torn ishlagan. Kinodagi qora tuynuk tasviri fandagi eng aniq vizual model hisoblanadi.

Film 2015 yilda “Eng yaxshi vizual effektlar” nominatsiyasida Oskar mukofotini qoʻlga kiritgan.

Bosh rollarda: Mettyu Makkonaxi, Enn Xeteuey, Jessika Chesteyn va Maykl Keyn.

Syujet

Yaqin kelajakda Yer sayyorasi ekologik inqiroz (qurgʻoqchilik, chang boʻronlari va oʻsimliklar kasalligi) tufayli halokat yoqasiga kelib qoladi. Insoniyat ochlikdan qirilish xavfi ostida yashaydi.

Sobiq NASA uchuvchisi va hozirda fermer Kuper tasodifan sobiq ishxonasining maxfiy bazasini topib oladi. Olimlar Saturn sayyorasi yaqinida paydo boʻlgan “qora tuynuk” orqali boshqa galaktikadan insoniyat yashashi uchun mos yangi sayyora izlashayotgan boʻladi.

Kuper oʻz farzandlarini Yerda qoldirib, koinotga yoʻl oladi. Biroq kuchli gravitatsiya tufayli fazodagi bir necha soat Yerdagi oʻnlab yillarga teng oʻtadi. Bu esa ota va qiz oʻrtasidagi vaqt aro eng taʼsirli dramaning boshlanishiga sabab boʻladi.