Oʻzbekiston U-17 terma jamoasi jahon chempionatiga yoʻl oldi
Osiyo kubogida oʻzbek futbolchilari Hindiston terma jamoasini ishonchli tarzda magʻlub etib, chorak finalga chiqishdi.
Sergey Chigodayev murabbiyligidagi Oʻzbekiston U-17 terma jamoasi 2026 yilda Qatarda boʻlib oʻtadigan Jahon chempionatiga yoʻllanmani qoʻlga kiritdi.
Osiyo kubogi guruh bosqichining ikkinchi turida oʻzbek futbolchilari Hindiston terma jamoasini 3:0 hisobida ishonchli tarzda magʻlub etishdi. Gollarga Laziz Abduraimov va Ahrorbek Ravshanbekov mualliflik qilishdi, Hindiston terma jamoasi esa avtogol ham urdi.
Ushbu gʻalaba bilan Oʻzbekiston terma jamoasi turnirning pley-off bosqichiga erta yoʻllanmani va U-17 Jahon chempionatiga yoʻllanmani qoʻlga kiritdi.
Musobaqa reglamentiga koʻra, guruhda dastlabki ikki oʻrinni egallagan jamoa Jahon chempionatiga yoʻllanma oladi. Biroq, guruhda oʻynashi rejalashtirilgan KXDR terma jamoasi ishtirok etishdan bosh tortdi.
