Elektr va gazni isteʼmolchilarni tarmoqdan ajratish va cheklov kiritish hisobidan tejashga yoʻl qoʻyilmaydi
2026 yil 1 iyuldan vazirlik va idoralar, davlat tashkilotlarining yangi binolarida energiya samaradorligi boʻyicha talab qoʻyiladi.
2026 yilda energiya samaradorligi yanada oshiriladi.
"2026 yilda energiya samaradorligini yanada oshirish, energiya resurslarini tejash va ulardan oqilona foydalanishning qoʻshimcha chora-tadbirlari toʻgʻrisida"gi Prezident Farmoni (PF–70-son, 29.04.2026 y.) qabul qilindi.
Farmonga koʻra, 2026 yil 1 iyuldan vazirlik va idoralar, davlat tashkilotlari va ijtimoiy soha muassasalari hamda davlat ishtirokidagi korxonalarning yangi quriladigan, rekonstruksiya (modernizatsiya) qilinadigan va mukammal taʼmirlanadigan bino va inshootlarida energiya samaradorligining"S" va undan yuqori toifasiga ega boʻlish talabi kiritiladi.
Elektr energiyasi va tabiiy gazni isteʼmolchilarni tarmoqdan ajratish va cheklov kiritish hisobidan tejashga yoʻl qoʻyilmaydi.
Energiya samaradorligi milliy agentligiga Energiya samaradorligini ragʻbatlantirish va qoʻllab-quvvatlash jamgʻarmasi orqali energiya servis kompaniyalari (ESKO) tomonidan davlat buyurtmalari asosida koʻrsatiladigan energiya servis xizmatlari uchun kafolatlangan toʻlovlarni amalga oshirish huquqi beriladi.
2026 yildan har yili energiya sarfi belgilangan normativlardan keskin oshib ketgan davlat obʼektlarida xalqaro standartlar va energiya servis mexanizmlari asosida energiya samaradorligini tubdan yaxshilash dasturlari amalga oshiriladi.
2026 yil 1 oktabrga qadar obʼektlar kesimida katta hajmdagi maʼlumotlar (Big Data), biznes-tahlil (Business Intellegence) va sunʼiy intellekt texnologiyalari asosida energiya isteʼmolini va samaradorlik koʻrsatkichlarini tahlil qilib borish amaliyoti yoʻlga qoʻyiladi.
