Oʻzbekistonda Haj mavsumi 2 maydan boshlanadi
Ziyoratchilar 9 ta hudud – Toshkent, Namangan, Fargʻona, Andijon, Samarqand, Buxoro, Qarshi, Termiz va Urganch shaharlaridagi aeroportlardan Madina shahriga toʻgʻridan-toʻgʻri uchadi.
Oʻzbekistondagi 2026 yilgi Haj mavsumi 2 maydan boshlanadi. Bu haqda Oʻzbekiston musulmonlari idorasi xabar berdi.
18 mayga qadar har kuni yurtimizdan Saudiya Arabistoniga aviaqatnovlar amalga oshiriladi.
Ziyoratchilar yurtimizning 9 ta hududi – Toshkent, Namangan, Fargʻona, Andijon, Samarqand, Buxoro, Qarshi, Termiz va Urganch shaharlaridagi aeroportlardan Madina shahriga toʻgʻridan-toʻgʻri uchadi.
Hamyurtlarimizni Madina shahriga yetkazish Saudiya Arabistonining FlyAdeal aviakompaniyasi tomonidan, hojilarni ona-Vatanimizga olib kelish esa Uzbekistan Airways tomonidan amalga oshiriladi.
Haj tadbirlarini tashkil etish boʻyicha quyidagi tayyorgarlik ishlari jadal amalga oshirilmoqda:
– ziyoratchilar tibbiy koʻrikdan oʻtkazilib, meningit kasalligiga qarshi emlandi;
– boʻlgʻusi hojilarning rasmiy haj vizalari va boshqa zarur hujjatlarni rasmiylashtirish yakunlandi;
– ziyoratchilarga guruh rahbarlari biriktirilib, safar oldi mashgʻulotlari oʻtkazilmoqda.
Ayni paytda Saudiya Arabistonida boʻlib turgan "Haj – 2026" mavsumi ilk ishchi guruhlari hamkor tashkilotlar bilan birga mehmonxonalar, Mino va Arofot vodiylarida ziyoratchilar ibodatlarini ado etishi uchun munosib sharoitlar tayyorlash boʻyicha faol ish olib bormoqda.
