Ziroat Mirziyoyeva "Bahor bilan hamnafas" festivalida ishtirok etdi
Yosh dizaynerlar Hamid Olimjon sheʼriyatidan ilhomlanib yaratilgan yorqin liboslar toʻplamini namoyish etdi. Xivaning yangi yashil jamoat makonini barpo etish tadbiri ham boʻlib oʻtdi.
Ziroat Mirziyoyeva ekomaktab oʻquvchilari va mahalliy aholi bilan birgalikda Xivaning yangi yashil jamoat makonini barpo etishda ishtirok etdi.
Yaqin-yaqingacha boʻsh turgan qariyb 8 gektarlik maydonga hududning tabiiy-iqlim sharoitidan kelib chiqib tanlangan 3 ming tupdan ortiq daraxt va oʻsimlik koʻchatlari oʻtqazilmoqda.
Yangi bogʻ nafaqat shaharga koʻrk bagʻishlaydi, balki hududning ekologik holatini yaxshilashga muhim hissa qoʻshib, aholi uchun soʻlim dam olish va muloqot maskaniga aylanadi.
Xorazm zaminining noyob merosi aynan bahorda oʻzgacha jilvalanadi. Bu esa Qarshi, Toshkent, Andijon, Nukus va Margʻilon shaharlaridagi "Zamin Creative" inklyuziv ijod studiyalari dizaynerlari, fotosuratchilari hamda aktyorlarini befarq qoldirmadi.
"Zamin" fondi Vasiylik kengashi aʼzolari tabiat uygʻonishi va yangilikni bosh gʻoya sifatida olgan "Bahor bilan hamnafas" festivalining faol ishtirokchilariga aylandi.
Yosh dizaynerlar Hamid Olimjon sheʼriyatidan ilhomlanib yaratilgan yorqin liboslar toʻplamini namoyish etdi.
Fotosuratchilar esa yangilikning paydo boʻlish lahzasini tadqiq etishga bagʻishlangan "Ibtido" nomli ajoyib oq-qora koʻrgazmani yarata oldi. Aktyorlar boʻlsa barchaga milliy raqs va zamonaviy xoreografiya muhitini hadya etdi.
