Saida Mirziyoyeva rekonstruksiya qilingan Urgutdagi poliklinikaga bordi
Prezident Administratsiyasi rahbari fermerlar oilasi – Haydarovlar xonadonida mehmon boʻlganini bildirgan.
Urgut tumanida joylashgan 21-sonli "Navoiy" oilaviy poliklinikasi kapital rekonstruksiyadan soʻng mutlaqo yangi qiyofa kasb etdi.
Prezident Administratsiyasi rahbari Saida Mirziyoyeva Samarqand viloyatiga tashrifi doirasida mazkur tibbiyot maskanida amalga oshirilgan keng koʻlamli qurilish va taʼmirlash ishlari, aholiga sifatli xizmat koʻrsatish uchun yaratilgan sharoitlar bilan tanishdi.
"Bugun davlatimiz rahbarining topshirigʻi bilan Samarqand viloyatiga bordik.
Toyloq tumanidagi barcha mahallalar aholisi toza ichimlik suvidan bahramand boʻla olishi uchun suv tarmoqlari qanday rekonstruksiya qilinayotgani va yangilanayotganini koʻzdan kechirdik.
Urgut tumanida ham boʻldik. Bu yerda yangi turar joylar, tibbiyot muassasalari, maktab va bogʻchalar qurilyapti, borlari esa yangilanib, kengaytirilmoqda", deya yozadi Mirziyoyeva.
Prezident Administratsiyasi rahbari fermerlar oilasi – Haydarovlar xonadonida mehmon boʻlganini bildirdi. Ularning tajribasini, shubhasiz, keng ommalashtirsa arziydi.
Rasmiylar Prezident topshirigʻiga koʻra tubdan qayta qurilgan “Navoiy” oilaviy poliklinikasiga ham borgan.
Bu yerdagi 16 ta qishloqning ayollariga xizmat koʻrsatayotgan tugʻruq boʻlimi eng zamonaviy talablarga javob beradi. Kuni kecha ushbu dargohda birinchi chaqaloq – Shavkatjon dunyoga keldi.
" Men buni boshlagan barcha ishlarimizning xayrli ekaniga bir ishora, deb bildim", deya taʼkidlaydi Saida Mirziyoyeva.
