YeI Ukrainaga 90 mlrd yevrolik kreditni maʼqulladi
Bundan tashqari Rossiyaga qarshi 20-sanksiyalar paketi eʼlon qilindi.
Yevropa Kengashi Rossiyaga qarshi 20-chi sanksiyalar paketini, shuningdek, Ukrainaga 90 milliard yevro miqdoridagi kreditni rasman maʼqulladi.
Bu haqda Kengash raisi Antonio Kosta eʼlon qildi.
"Ukrainada adolatli va uzoq muddatli tinchlikka erishish boʻyicha Yevropa Ittifoqi strategiyasi ikkita ustunga asoslangan: Ukrainani mustahkamlash va Rossiyaga bosimni kuchaytirish. Bugun biz ikkala jabhada ham yutuqlarga erishdik", dedi Kosta X tarmogʻidagi postida.
Vengriya avvalgi vetosini bekor qilganidan soʻng, Yevropa Ittifoqi elchilari kredit va yangi sanksiyalarni maʼqulladilar.
20-chi sanksiyalar paketi Rossiya neftini dengiz orqali tashishni taqiqlashni, 46 ta tankerga cheklovlarni va Rossiya bilan kriptovalyuta operatsiyalarini cheklashni oʻz ichiga oldi. Taqiq yana 20 ta Rossiya banki bilan bitimlarga ham tegishli.
Sanksiyalar Rossiya harbiy-sanoat kompleksi bilan bogʻliq 58 ta yuridik va jismoniy shaxsni, shuningdek, Xitoy va BAA kompaniyalarini oʻz ichiga olgan 60 dan ortiq kompaniyalarni qamrab olish uchun kengaytirildi.
Yevropa Kengashining matbuot reliziga koʻra, Yevropa Ittifoqi Rossiyaga qarshi 20-chi sanksiyalar roʻyxatiga toʻrt nafar rossiyalik jurnalistni, jumladan, "davlat tomonidan moliyalashtiriladigan platformalarda" efirga uzatayotgan xodimlarni qoʻshdi. Jurnalistlar nomi ochiqlanmagan.
Bundan tashqari, Yevropa Ittifoqi Rossiya ommaviy axborot vositalariga cheklovlarni kuchaytirdi. Sanksiyalar roʻyxatiga Yevropa Ittifoqida taqiqlangan ommaviy axborot vositalarining kontentini takrorlaydigan saytlar kiritilgan.
