Kinotavsiya: “Otto”, “Jango”, Avatar-3” va boshqalar

“Kinotavsiya” loyihasining navbatdagi sonida yangi premera va retro filmlar oʻrin oldi. Marhamat, ular bilan tanishing.

5. “Kichkina tabib”, 1998

1998 yilda suratga olingan mashhur oʻzbek badiiy filmi. Ushbu kino komediya va drama janrlarini oʻzida jamlagan boʻlib, oʻzbek kinosining klassik namunalaridan biri hisoblanadi. Rejissyor va ssenariy muallifi: Zulfiqor Musoqov. bosh rollarda Dilshodbek Kattabekov, Murod Rajabov, Karim Mirhodiyev, Hojiakbar Nurmatov, Fotima Rejametova va Rajab Adashev.

Syujet

Film togʻli qishloqda yashovchi kichkina Doniyor ismli bolakay haqida. U atrofidagilarga noodatiy usullar bilan shifo berish qobiliyatiga ega. Doniyorning shuhrati tez orada butun mamlakatga tarqaladi va uning oldiga turli insonlar shifo istab kela boshlaydi. Filmda kichkina tabibning boshidan kechirgan qiziqarli va gohida gʻamgin sarguzashtlari, insoniylik va mehr-oqibat mavzulari mahorat bilan ochib berilgan.

4. “Otto”, 2022 (AQSh)

Komediya va drama janrlarini oʻzida mujassam etgan mashhur film. U shved yozuvchisi Fredrik Bakmanning “Uve ismli kishi” bestselleri asosida ishlangan. Rejissyor: Mark Forster. Bosh rolda Tom Xenks.

Filmda Ottoning yoshligini Tom Xenksning oʻgʻli Truman Xenks ijro etgan. Bu kino 2015 yildagi “Uve ismli kishi” nomli Shvetsiya filmining Hollivud versiyasi (rimeyki) hisoblanadi.

Syujet

Film Otto Anderson ismli keksa, jahldor va har bir narsadan ayb qidiradigan yolgʻiz erkak haqida. Xotini vafot etgach, u hayotdan mazmun topolmay, oʻz joniga qasd qilishga urinadi. Biroq qoʻshni uyga koʻchib kelgan sergʻayrat va quvnoq oila, ayniqsa, Marisol ismli ayol uning rejalarini buzib yuboradi.

Kutilmagan doʻstlik Ottoning dunyoqarashini oʻzgartiradi va unga hayotni qaytadan sevishga yordam beradi. Bu film insoniylik, mehr-oqibat va ogʻir damlarda bir-birini qoʻllab-quvvatlash naqadar muhimligi haqidadir.

3. “Muzokara ustasi”, 1998 (AQSh)

Psixologik triller va jangari kinoning eng sara namunalaridan biri hisoblanadi. Rejissyor: F.Geri Grey. Bosh rollarda: Semyuel L.Jekson va Kevin Speysi.

Semyuel L.Jekson va Kevin Speysining ekrandagi qarama-qarshiligi juda kuchli ishlangan. Bu ularning faoliyatidagi eng yaxshi rollardan biri hisoblanadi. Kinoda 90-yillarning jangari filmlariga xos boʻlgan haqiqiylik va shiddat mujassam.

Syujet

Film markazida Chikago politsiyasining mohir muzokara ustasi Denni Rouman (Semyuel L.Jekson) turadi. Uning hayoti bir kechada ostin-ustun boʻlib ketadi: sherigi oʻldiriladi va Rouman politsiya nafaqa jamgʻarmasidan pul oʻgʻirlaganlikda nohaq ayblanadi.

Hech kim unga ishonmayotganini koʻrgan Denni chorasizlikdan politsiya boshligʻi va boshqa xodimlarni garovga oladi. U oʻzini oqlash uchun faqat bir kishi – boshqa tumandan boʻlgan va korrupsiyaga aloqasi yoʻq muzokarachi Kris Sebian (Kevin Speysi) bilan gaplashishni talab qiladi. Ikki professional oʻrtasidagi aql va soʻz jangi filmning asosiy qismini tashkil etadi.

2. “Ozod Jango”, 2012 (AQSh)

Mashhur rejissyor Kventin Tarantino tomonidan suratga olingan, vestern va drama janridagi shov-shuvli film. Ushbu kino Amerikadagi qullik davri haqida boʻlib, oʻziga xos uslubi va oʻtkir syujetlari bilan ajralib turadi.Bosh rollarda: Jeymi Foks, Kristof Vals, Leonardo Di Kaprio va Semyuel L.Jekson.

Film 2 ta “Oskar” (Eng yaxshi ssenariy va Kristof Vals uchun eng yaxshi ikkinchi plandagi erkak roli) mukofotini olgan.

Leonardo Di Kaprio va Semyuel L.Jeksonning salbiy rollari filmning eng kuchli tomonlaridan biri. Tarantinoga xos boʻlgan uzun, qiziqarli va kutilmagan mazmundagi suhbatlar filmga bezak bergan. Filmda klassik vestern musiqalari va zamonaviy xip-xop yoʻnalishi mahorat bilan uygʻunlashtirilgan.

Syujet

Voqealar AQShda fuqarolar urushi boshlanishidan ikki yil oldin sodir boʻladi. Nemis tish shifokori va ayni paytda “bosh kallakesar” (jinoyatchilarni tutib pul ishlovchi) doktor King Shuls ismli kishi Jango ismli qulni ozod qiladi.

Shulsga xavfli jinoyatchilarni topishda Jangoning yordami kerak boʻladi. Evaziga u Jangoga toʻliq ozodlik va uning shafqatsiz plantator qoʻlida qolib ketgan rafiqasi Brumxildani topishda yordam berishni vaʼda qiladi. Ularning yoʻli yovuz va makkor plantatsiya egasi Kelvin Kendi (Leonardo Di Kaprio) huzuriga yetaklaydi.

1. “Avatar-3: olov va kul”, 2025 (AQSh)

Taniqli rejissyor Jeyms Kemeronning mashhur franshizasining uchinchi qismi. Eski qahramonlar (Jeyk Salli, Neytiri) bilan bir qatorda yangi yulduzlarni ham koʻrish mumkin. Mishel Yeo (doktor Karina Moug rolida, ammo uning asosiy ishtiroki 4-qismga toʻgʻri kelishi aytilmoqda). Devid Tyulis va Keyt Uinslet ham oʻz rollariga qaytgan.

Film “Avatar: Suv yoʻli” bilan parallel ravishda suratga olingan. Filmning byudjeti 350-400 million dollar atrofida baholangan.

Syujet

Uchinchi qismda Pandora dunyosi yanada kengayadi. Kul qavmi – filmda olov unsuriga asoslangan va avvalgilaridan farqli ravishda agressiv boʻlgan yangi qabila. Rejissyor bu gal navilarning faqat ijobiy emas, balki salbiy tomonlarini ham koʻrsatib, “yaxshi” va “yomon” tushunchalari oʻrtasidagi chegarani xiralashtirishini taʼkidlagan. Kul qavmi rahbari – Varang ismli qahramon boʻlib, uni “Taxtlar oʻyini” yulduzi Una Chaplin ijro etgan.