Fargʻonadagi chegara hududida yirik miqdorda narkotik moddalar qoʻlga olindi
Sirdaryo daryosi qirgʻogʻida nomaʼlum shaxslar tomonidan 4 dona polietilen qoplar qoldirib ketilgan. Ular qoʻshni davlatdan kontrabanda qilingan.
Chegara hududida katta miqdordagi narkotik moddalar aniqlandi.
DXX Chegara qoʻshinlari harbiy xizmatchilari tomonidan davlat chegarasini qoʻriqlash va uning daxlsizligini taʼminlashga qaratilgan tezkor-profilaktik tadbirlar davomida noqonuniy holat aniqlandi.
Xususan, Sirdaryo daryosining Fargʻona viloyati Beshariq tumani Shodiqoziq MFY hududidan oʻtuvchi qismi qirgʻogʻida nomaʼlum shaxslar tomonidan 4 dona polietilen qoplar qoldirib ketilganligi maʼlum boʻldi.
Mazkur qoplar xolislar ishtirokida koʻzda kechirilganda, ularning ichida qoʻshni davlatdan kontrabanda qilingan jami 48 dona oʻramda 47 kg 113 gr “gashish”, 15 dona oʻramda 7 kg 779 gr “opiy” giyohvandlik vositalari, shuningdek, 10 710 dona “Lidaza” va 756 dona “Tenoksikam” nomli dori vositalari borligi aniqlanib, protsessual tartibda rasmiylashtirib olindi.
Holat yuzasidan Jinoyat Kodeksining 246-moddasi (kontrabanda) 2-qismi bilan jinoyat ishi qoʻzgʻatildi.
Tergov harakatlari doirasida narkotik moddalar egalarining shaxsini aniqlash boʻyicha zarur choralar koʻrilmoqda.
