Xorijdan onlayn tarzda smartfon va noutbuk xarid qilinganda 5 foiz yagona bojxona toʻlovi undiriladi
Bu planshet, mikser, sharbat chiqargich, soch quritish uskunasi, elektr choynak, multipishirgichlar, dazmollar uchun ham amal qiladi. Ushbu tartib 2026 yil 1 iyuldan joriy etiladi.
Ayrim tovarlarni xorijdan onlayn xarid qilganda yagona bojxona toʻlovi undiriladi. Bu haqda Davlat bojxona qoʻmitasi xabar berdi.
2026 yil 1 iyuldan 5 ta pozitsiyadagi tovarlar, jumladan, smartfon, noutbuk, planshet, kolonka, mikser, sharbat chiqargich, soch quritish uskunasi, elektr choynak, multipishirgichlar, dazmol va boshqa tovarlar xorijdan onlayn xarid qilinganda, 5 foiz miqdorida yagona bojxona toʻlovi toʻlanadi.
Shuningdek, 30 ta pozitsiyadagi tovarlar, jumladan, kiyim-kechaklar, poyabzal, soatlar, xotira qurilmalari, quvvatlagich, fonar, quloqchin, monitor va proyektorlar, videooʻyin apparatlari kabi tovarlar uchun esa qoʻshilgan qiymat soligʻi va 3 foiz miqdorida bojxona boji toʻlanadi.
Butunjahon intellektual mulk tashkilotining Global brend maʼlumotlar bazasida roʻyxatdan oʻtgan xalqaro brend va Oʻzbekiston Respublikasi hududida xalqaro brend tovarlari reyestriga kiritilgan chet el tovarlarini bond omboriga joylashtirish va maxsus elektron savdo platformalari orqali realizatsiya qilish taqiqlanadi.
Boshqa tovarlar uchun esa amaldagi xalqaro kurerlik joʻnatmalari orqali jismoniy shaxslar nomiga olib kelinadigan tovarlarga nisbatan bojsiz olib kirishning belgilangan oyiga 200 AQSh dollari normasi saqlanib qoladi.
