Toshkentda chorraha, bekat va piyodalar yoʻlaklari uchun 2,5 mlrd soʻmdan oshiq pul ajratiladi

Toshkentda byudjetdan 2,5 mlrd soʻmdan oshiq pul ajratiladi.

​Toshkent shahar hokimi Shavkat Umrzoqov poytaxtdagi chorrahalarni tartibga solish, piyodalar yoʻlaklari va avtobus bekatlarini bosqichma-bosqich taʼmirlash toʻgʻrisidagi qarorni imzoladi. Qaror 2026 yil 16 aprelda eʼlon qilindi.

Buning uchun Toshkent shahar mahalliy byudjetining zaxira jamgʻarmasidan jami 2 501,0 mln (2,5 milliarddan ortiq) soʻm mablagʻ ajratiladi.

Jumladan, shahar koʻchalaridagi yoʻlaklarni II, III va IV bosqichlarda mukammal taʼmirlash 1 060,1 mln soʻm beriladi. Yoʻl harakatini qayta koʻrib chiqish va zarur taʼmirlash ishlarini bajarish uchun — 1 054,8 mln soʻm. ​Bekatlarni tartibga keltirish va taʼmirlashning I bosqichi uchun — 386,1 mln soʻm.

Mazkur ishlar uchun buyurtmachi etib Toshkent shahar hokimligining "Yagona buyurtmachi xizmati" injiniring kompaniyasi belgilandi. Qaror ijrosini nazorat qilish hokim oʻrinbosarlari B.Rahmonov va A.Baxtiyev zimmasiga yuklatilgan.