21 mlrd soʻmdan ortiq davlat xaridlarida qonun buzilgani aniqlandi
Holat “Oʻzbekiston temir yoʻllari” AJ tizim tashkilotidagi oʻrganishlar natijasida kuzatilgan.
21 mlrd soʻmdan ortiq davlat xaridlaridagi qonunbuzilishlar yuzasidan tegishli choralar koʻrildi. Bu haqda Raqobat qoʻmitasi xabar berdi.
Raqobat qoʻmitasining Toshkent shahar boshqarmasi tomonidan “QUYUV-MEXANIKA ZAVODI” AJ tomonidan oʻtkazilgan eng yaxshi takliflarni tanlash (tender) savdolari “Raqobat toʻgʻrisida”gi qonun talablariga muvofiqligi yuzasidan oʻrganish ishlari olib borildi.
Olib borilgan oʻrganishlar natijasida, “Oʻzbekiston temir yoʻllari” AJ tizim tashkiloti “QUYUV-MEXANIKA ZAVODI” AJ tomonidan oʻtkazilgan jami 21 mlrd soʻmdan ortiq boʻlgan 8 ta tanlov savdolarida “Raqobat toʻgʻrisida”gi Qonunining 29-moddasi talablariga rioya qilinmagani aniqlandi. Yaʼni savdolarda raqobatni cheklaydigan yoki cheklashga olib kelishi mumkin boʻlgan harakatlar kuzatilgan.
Yuqoridagilarga muvofiq, Qoʻmitaning hududiy boshqarmasi Maxsus komissiyasi tomonidan “Raqobat toʻgʻrisida”gi Qonun talablari buzilish alomatlari bilan buyurtmachi tashkilotga nisbatan ish qoʻzgʻatildi. Ish natijasi yuzasidan belgilangan tartibda tegishli taʼsir chorasi qoʻllanildi.
Shuningdek, qonunbuzilish holatlarini bartaraf etish va kelgusida yoʻl qoʻymaslik boʻyicha bajarilishi majburiy boʻlgan koʻrsatma berildi.
