Sirdaryoda sudya pora bilan qoʻlga olindi
U oʻz yurituvidagi iqtisodiy ishni kassatsiya instansiyasida Gulistondagi MChJ foydasiga hal qilish evaziga 3 600 dollar soʻragan.
Sirdaryoda sudya pora bilan qoʻlga olindi. Bu haqda Oliy sud xabar berdi.
Sirdaryo viloyat sudining iqtisodiy ishlar boʻyicha sudyasi E. S. oʻz ish yurituvidagi iqtisodiy ishni kassatsiya instansiyasida Guliston shahrida faoliyat yurituvchi MChJ foydasiga hal qilish evaziga 3 600 AQSh dollari olganlikda gumonlangan. U huquqni muhofaza qiluvchi organ xodimlari tomonidan oʻtkazilgan tezkor tadbirda ashyoviy dalil bilan ushlangan.
"Oliy sud tomonidan sud organlarida korrupsiyaga qarshi kurashish, tizimni nopok kadrlardan tozalash borasida barcha zarur saʼy-harakatlar amalga oshirilmoqda", deyiladi xabarda.
Avvalroq Oʻsimliklar karantini agentligi inspektori qoʻlga olingandi.
