DXX xorijdan boʻlayotgan shubhali qoʻngʻiroqlardan ogohlantirdi
Bunday qoʻngʻiroqlar oddiy telefon emas, balki internet va maxsus dasturlar orqali amalga oshiriladi.
DXX xorijdan boʻlayotgan shubhali qoʻngʻiroqlardan ogohlantirdi.
Soʻnggi vaqtlarda Oʻzbekiston fuqarolarining telefon raqamlariga xorijdan shubhali qoʻngʻiroqlar boʻlishi koʻp kuzatilmoqda. Mazkur holatlar yuzasidan mutaxassislar tomonidan oʻtkazilgan tahlillar natijasida quyidagilar aniqlandi.
Xususan:
- bunday qoʻngʻiroqlar oddiy telefon emas, balki internet va maxsus dasturlar orqali amalga oshiriladi. Firibgarlar ushbu tizimlar yordamida oʻzlarining haqiqiy raqamlarini yashirib, telefon ekranida istalgan davlatning soxta raqamini koʻrsatishlari mumkin;
- ular qoʻngʻiroqni internet orqali yuborib, raqamni avvaldan soxtalashtirib qoʻyganliklari bois, mobil kompaniyalar tizimida bu qoʻngʻiroqni kim va qayerdan amalga oshirganligini aniqlash mushkul;
- bunday raqamlar xususida maxsus bazalarda hech qanday maʼlumot boʻlmaydi. Bu esa ularning aslida SIM-karta emasligini, balki qoʻngʻiroq paytida soxtalashtirilgan va vaqtinchalik raqamlar ekanligini anglatadi.
Taʼkidlash joizki, shubhali qoʻngʻiroqlar abonentlar uchun quyidagi xavflarni yuzaga keltiradi:
- bunday xorijiy raqamlarga qoʻngʻiroq qilish telefon balansidagi mablagʻning yechib olinishiga sabab boʻladi;
- firibgarlar oʻzlarini turli tashkilot xodimi sifatida tanishtirib, shaxsiy maʼlumotlar va bank kartasi kodlarini bilib olishga urinadi;
- goʻshakni koʻtarish raqamingizning “faol” ekanligini bildiradi va natijada sizga boʻladigan firibgarlik hujumlari soni keskin ortadi;
- sizning ovozingiz yozib olinib, keyinchalik sunʼiy intellekt yordamida soxtalashtirish orqali yaqinlaringizni aldash uchun ishlatilishi mumkin.
