Prezident Buxoroga joʻnab ketdi
Shavkat Mirziyoyev ushbu shaharda Qosim-Joʻmart Toʻqayev bilan uchrashadi, oliy darajadagi muzokaralar boʻlib oʻtadi.
Oʻzbekiston Respublikasi Prezidenti Shavkat Mirziyoyev Buxoro shahriga joʻnab ketdi.
Ertaga, 11 aprel kuni Qozogʻiston Respublikasi Prezidenti Qosim-Joʻmart Toʻqayev amaliy tashrif bilan mamlakatimizda boʻladi.
Tashrif doirasida Buxoroda oliy darajadagi muzokaralar boʻlib oʻtadi. Unda Oʻzbekiston – Qozogʻiston doʻstlik, strategik sheriklik va ittifoqchilik munosabatlarini yanada rivojlantirish masalalari koʻrib chiqiladi. Siyosiy muloqotni, parlamentlararo, hukumatlararo va hududlararo aloqalarni mustahkamlashga alohida eʼtibor qaratiladi.
Shuningdek, yetakchilar tovar ayirboshlash hajmini oshirish, sanoat kooperatsiyasini chuqurlashtirish, transport, energetika, suv va ekologiya sohalarida qoʻshma loyiha va dasturlarni ilgari surish hamda madaniy-gumanitar almashinuvni faollashtirish masalalarini muhokama qiladilar.
Xalqaro va mintaqaviy kun tartibidagi masalalar yuzasidan ham fikr almashiladi.
Birgalikda tarixiy obidalarni ziyorat qilish, sanoat korxonalari faoliyati va mahsulotlar koʻrgazmasi bilan tanishish rejalashtirilgan.
Bugun esa davlatimiz rahbari Buxoro viloyatini ijtimoiy-iqtisodiy rivojlantirish boʻyicha amalga oshirilayotgan ishlar va istiqbolli loyihalar bilan tanishadi.
