Politico: Trampning NATO bosh kotibi bilan uchrashuvi janjalga aylandi
Tramp oʻz ittifoqchilari Eronga qarshi urushda qoʻllamagani uchun "qasos" vaʼda qilgan.
AQSh prezidenti Donald Tramp NATO bosh kotibi Mark Ryutte bilan uchrashuv chogʻida ittifoqchilarini tanqid qildi va Yaqin Sharqdagi urushda AQShni qoʻllab-quvvatlamagani sababli qasos choralarini koʻrishni koʻrib chiqayotganini aytdi.
Bu haqda Politico oʻz manbalariga asoslanib xabar berdi.
"Hammasi notoʻgʻri ketdi. Suhbat haqoratlarga toʻla boʻldi", dedi yevropalik amaldorlardan biri.
Bu manba Tramp qasos choralarini vaʼda qilganini tasdiqladi. Ikkinchi manba esa Politico nashriga uchrashuvda ishtirok etganlar Prezident Tramp oʻz ittifoqchilaridan Hormuz boʻgʻozini tezda qayta ochish uchun "aniq choralar" koʻrishini kutayotganini aytishdi.
Biroq, Oq uy vakili Politico nashriga Tramp Ryutte bilan suhbatida ittifoqqa hech qanday talab qoʻymaganiga ishontirdi.
Yana bir yevropalik amaldorga koʻra Tramp ittifoqchilariga qarshi hech qanday "aniq tahdidlar" qilmagan. "Bu uning boshqa sharhlaridan farq qiladi", deb taʼkidladi u.
Mark Ryuttening oʻzi kecha Donald Tramp bilan uchrashuv doʻstona muhitda oʻtganini aytdi. NATO Bosh kotibi baʼzi ittifoq mamlakatlari Eron bilan mojaroda Qoʻshma Shtatlarga yordam berishdan bosh tortib, "sinovdan oʻta olmaganiga" qoʻshildi. Ryutte shuningdek, NATOning Hormuz boʻgʻozi orqali yuk tashishni taʼminlashda ishtirok etish imkoniyatini ham istisno qilmadi.
17 mart kuni Donald Tramp Yevropa ittifoqchilarini Eronga qarshi operatsiyada va Hormuz boʻgʻozini ochishda yordam berishdan bosh tortgani uchun tanqid qildi. 1 aprel kuni The Telegraph nashriga bergan intervyusida prezident ittifoqdan chiqishni koʻrib chiqayotganini aytdi. Reuters agentligining manbalarga asoslanib xabar berishicha, Tramp ittifoqchilar yaqin kunlarda Hormuz boʻgʻozini qayta ochishga vaʼda berishlarini kutmoqda.
