Tramp AQSh va Eron ikki haftalik sulhga erishganini aytdi
Pokiston Bosh vaziri Shahboz Sharif Vashington va Tehron oʻrtasidagi sulh darhol kuchga kirishini bildirgan.
AQSh prezidenti Donald Tramp Eronga ultimatumni ikki haftaga uzaytirishga rozi boʻldi.
Amerika prezidentining soʻzlariga koʻra, tomonlar tinch yoʻl bilan hal qilish yoʻlida oldinga siljishlarga erishdilar va kelishuv shu ikki hafta ichida yakunlanadi.
Tramp Eron 10 banddan iborat tinchlik rejasini taklif qilganini aytdi. Truth Social sahifasida Tramp Hormuz boʻgʻozi toʻliq va xavfsiz tarzda qayta ochilishi sharti bilan ikki hafta ichida Eronga hujumlarni toʻxtatishga tayyorligini yozdi.
Muzokaralarda vositachi boʻlgan Pokiston bosh vaziri Shahboz Sharif Donald Trampdan muddatni ikki haftaga uzaytirishni soʻradi. Uning taʼkidlashicha, buning evaziga Tehron Hormuz boʻgʻozini ochishi kerak boʻladi.
Amerika prezidenti 7 aprel kuni soat 20:00 ni muddat sifatida belgilab, Erondan boʻgʻozni ochishni va sulh eʼlon qilishni talab qildi. Aks holda, u Eronning elektr stansiyalari va koʻpriklariga zarba berish bilan tahdid qildi.
Pokiston Bosh vaziri Shahboz Sharif Vashington va Tehron oʻrtasidagi sulh darhol kuchga kirishini eʼlon qildi.
"Men bu dono qarorni iliq qabul qilaman va ikki mamlakat rahbariyatiga chuqur minnatdorchiligimni bildiraman", deb yozdi u ijtimoiy tarmoqlarda.
AQSh maʼmuriyati rasmiysi The New York Times nashriga bergan intervyusida ikki haftalik sulh bitimiga muvofiq Amerikaning Eronga qarshi harbiy hujumlari toʻxtatilganini aytdi.
