Oʻzbekiston jahon chempionatidan qancha pul olishi maʼlum qilindi
Agar jamoa pley-offga chiqsa, pul miqdori 12,5 million dollargacha oshishi mumkin.
Oʻzbekiston termasi JCh-2026'da kamida qancha pul ishlashi aytildi.
Milliy jamoa 2026 yilgi Jahon chempionatida ishtirok etadi va taxminan 10 million dollar daromad olishi kafolatlangan.
FIFA turnirga tayyorgarlik koʻrish uchun har bir jamoaga 1,5 million dollar toʻlaydi. 33-oʻrindan 48-oʻringacha boʻlgan va oʻz guruhidan chiqmagan jamoalar 9 million dollar, 17-oʻrindan 32-oʻringacha boʻlgan jamoalar esa 11 million dollar oladi.
Shunday qilib, Oʻzbekiston milliy terma jamoasi 10,5 million dollar olishi kafolatlangan. Agar ular oʻz guruhidan chiqib, pley-offga oʻtsa, bu miqdor 12,5 million dollargacha oshishi mumkin.
2026 yilgi Jahon chempionati AQSh, Meksika va Kanadada boʻlib oʻtadi: turnir 11 iyunda boshlanadi va 19 iyulda tugaydi.
Oʻzbekiston oʻz tarixida birinchi marta Jahon chempionatida ishtirok etadi; jamoa Portugaliya, Kolumbiya va Kongo Demokratik Respublikasi bilan birgalikda K guruhida. Oʻzbekiston jamoasi oʻzining birinchi oʻyinini 18 iyunda Kolumbiya terma jamoasiga qarshi oʻtkazadi.
