YPX xodimiga qoʻl koʻtargan fuqaroning IIV tizimidagi akasi ishdan olindi
Xizmat intizomini buzgan shaxslarga nisbatan javobgarlik muqarrarligi prinsipi amalda taʼminlanishi ham aytilgan.
Sirdaryo viloyati IIB rahbar xodimi podpolkovnik Sherzod Pardayev ishdan olindi. 2 aprel kuni ijtimoiy tarmoqlarda tarqalgan – u va uning yaqin qarindoshi ishtirokidagi huquqbuzarlik bunga sabab boʻlgan.
Sirdaryo viloyati Ichki ishlar boshqarmasida IIV tizimida qonuniylik va xizmat intizomini taʼminlash masalalariga bagʻishlangan navbatdagi yigʻilish boʻlib oʻtgan.
Ushbu holat xizmat vakolatlarini suiisteʼmol qilish va mansab mavqeidan shaxsiy manfaatlar yoʻlida foydalanish ehtimolini koʻrsatuvchi salbiy holat sifatida huquqiy baholangan.
Ichki ishlar vaziri oʻrinbosari Diyorbek Sattarov xizmat intizomini buzgan shaxslarga nisbatan javobgarlik muqarrarligi prinsipi amalda taʼminlanishini aytgan.
Tarqalgan videoda bir fuqaro mast holda mashina haydagan, YPX xodimlari qonuniy talablariga boʻysunmagan va xodimga qoʻl koʻtargan edi.
