Xorazmda byudjetdan 16 mlrd soʻmdan oshiq pul ajratiladi

Xorazmda byudjetdan 16,3 mlrd soʻmdan oshiq pul ajratiladi. Bu haqda Xalq deputatlari Xorazm viloyati kengashi qarorida aytiladi. Qaror 2026 yil 30 mart kuni eʼlon qilingan.

Ushbu mablagʻlarning asosiy qismi qurilish va tadbirlarga yoʻnaltiriladi.

Yil boshida aniqlangan erkin qoldiq mablagʻlari hisobidan jami 16 mlrd 322,1 mln soʻm turli yoʻnalishlarga sarflanadi.

Qarorga koʻra, mablagʻlarning eng katta qismi qurilish va infratuzilma loyihalariga ajratilgan. Xususan, viloyat hokimligi huzuridagi “Yagona buyurtmachi xizmati” orqali amalga oshiriladigan maʼmuriy binolar va xizmat uylari qurilishi hamda taʼmirlash ishlari uchun 4 mlrd 985 mln soʻm sarflanadi. Mazkur qurilishlar Bogʻot, Qoʻshkoʻpir tumanlari va Urganch shahrida amalga oshiriladi.

Shuningdek, Yangiariq tumanidagi dala oʻquv maydonini modernizatsiya qilish, elektr tarmogʻi va hojatxona qurish uchun 1,5 mlrd soʻm, bir nechta hududlarda yoʻllarga piyodalar harakatini cheklovchi panjaralar oʻrnatish uchun esa 1 mlrd 22 mln soʻm ajratilgan.

Madaniy tadbirlar ham yirik moliyalashtirilgan yoʻnalishlardan biri boʻldi. Qarorga muvofiq, “Lazgi” III xalqaro raqs festivalini tashkil etish va oʻtkazish uchun 2 mlrd soʻm ajratilgan. Bu summa umumiy xarajatlar tarkibida eng katta bandlardan biri hisoblanadi.

Sport sohasiga ham sezilarli mablagʻ yoʻnaltirilgan. Jumladan, viloyat futzal jamoasi faoliyati uchun 600 mln soʻm, Pahlavon Mahmud xotirasiga bagʻishlangan xalqaro turnir uchun 498,1 mln soʻm, ommaviy yugurish musobaqalari uchun esa 250 mln soʻm ajratilgan.

Ijtimoiy va sogʻliqni saqlash yoʻnalishlari ham qamrab olingan. Xususan, yadro tibbiyoti xizmatlarini rivojlantirish loyihasi uchun 550 mln soʻm, koʻp qavatli uylarni taʼmirlash uchun 683,5 mln soʻm, liftlarni texnik sinovdan oʻtkazish uchun esa 276 mln soʻm yoʻnaltirilgan.

Shuningdek, davlat boshqaruvi va texnik infratuzilmani rivojlantirish maqsadida “Raqamli vaziyatlar markazi”ni tashkil etish uchun 550 mln soʻm, soliq tizimini texnik jihatdan taʼminlash uchun 388,3 mln soʻm, kiberxavfsizlik auditi uchun esa 20 mln soʻm ajratilgan.

Tahlil shuni koʻrsatadiki, ajratilgan mablagʻlarning asosiy qismi qurilish va infratuzilma loyihalariga yoʻnaltirilgan boʻlsa, undan keyingi oʻrinda madaniy tadbirlar va sport xarajatlari turadi. Ijtimoiy yoʻnalishlar, jumladan sogʻliqni saqlash va uy-joy kommunal sohasiga ajratilgan mablagʻlar esa nisbatan kamroq ulushni tashkil etadi.