Ushbu haftada qisqa yomgʻirlar va momaqaldiroqli ob-havo kutiladi

"Oʻzgidromet" boshlangan hafta uchun ob-havo maʼlumotini taqdim etdi. Bugun kunduzi Oʻzbekistonning shimoli-gʻarbiy hududlarida va kunning ikkinchi yarmida markaziy va janubiy viloyatlar boʻyicha ayrim joylarda qisqa muddatli yomgʻir yogʻadi, momaqaldiroq kuzatilishi mumkin.

Fargʻona vodiysi viloyatlarida yogʻingarchilik kutilmaydi. Havo harorati 20-25 daraja iliq boʻladi.

31 mart va 1 aprel kunlari Qoraqalpogʻiston Respublikasi, Xorazm, Buxoro va Navoiy viloyatlarida, shuningdek, respublikaning togʻ oldi va togʻli hududlarida momaqaldiroq bilan qisqa muddatli yomgʻir yogʻadi. Kunduzgi havo harorati 27-30 daraja iliq atrofida boʻladi.

2 aprelda shimoli-gʻarbiy hududlarda, choʻl zonasida va janubiy viloyatlarda, 3 aprelda esa respublikaning koʻpchilik viloyatlarida baʼzi joylarda momaqaldiroq bilan qisqa muddatli yomgʻirlar yogʻishi kutilmoqda.

Harorat 24-27 darajagacha, janubda 20-22 darajagacha pasayadi.

Shamol 7-12 m/s tezlikda esadi, janubda va choʻl hududlarda 14 m/s gacha kuchayishi, ayrim joylarda chang-toʻzonlar bilan kuzatilishi mumkin.

Togʻ oldi va togʻli hududlarda sel-suv toshqin hodisalari yuzaga kelishi mumkin.

Toshkentda: bugun yogʻingarchilik kutilmaydi, faqat kechga tomon biroz yomgʻir yogʻishi, momaqaldiroq kuzatilishi mumkin. Harorat 22-24 daraja iliq boʻladi.

31 mart va 1-2 aprel kunlari yogʻingarchilik kutilmaydi. Harorat kunduzi 27-29 daraja iliq boʻladi. 3 aprelda biroz yomgʻir yogʻishi mumkin. Kunduzgi harorat 24-27 daraja iliq boʻladi. Shamol sharqdan 3-8 m/s tezlikda esadi.