Slovakiya bosh vaziriga nisbatan davlatga xiyonat aybi bilan tekshiruv boshlandi
Bosh vazir muholifat tomonidan hokimiyatni suiisteʼmol qilishda, insoniyatga qarshi jinoyatlarda va terroristik faoliyatda ishtirok etishda gumon qilingan.
Slovakiya politsiyasi bosh vazir Robert Fitsoga qarshi davlatga xiyonat qilish aybi boʻyicha tergov boshladi.
Tergovga muxolifatdagi Ozodlik va Birdamlik partiyasi (Sloboda a Solidarita, SaS)ning ijtimoiy tarmoqlarda eʼlon qilgan bayonoti sabab boʻldi, uning rahbari Branislav Groling sanaladi.
"Bir oy oldin men Fitsoga qarshi davlatga xiyonat va boshqa jinoyatlar boʻyicha shikoyat arizasi berdim. SaSʼdagi hamkasblarimdan tashqari, ushbu shikoyatga 13 000 dan ortiq odam qoʻshildi. Bu uni mamlakat tarixidagi eng katta politsiya shikoyatiga aylantiradi", deb yozdi Groling Instagramda.
Grolingning taʼkidlashicha, Bosh prokuraturadan kelgan shikoyat viloyat prokuraturasiga, keyin esa politsiyaga yuborilgan. "Men Robert Fitsoning jiddiy jinoyatlarda gumon qilinayotganiga aminman, shuning uchun ham prokuratura, ham politsiya bu ish ustida ishlayotganini va uni eʼtiborsizlik qilmaganini qadrlayman", dedi Groling.
Pravda nashri taʼkidlaganidek, muxolifat shuningdek, bosh vazirni hokimiyatni suiisteʼmol qilishda, insoniyatga qarshi jinoyatlarda va terroristik faoliyatda ishtirok etishda gumon qilmoqda. Buning sababi Ukrainaga "favqulodda elektr energiyasi" deb ataladigan taʼminotning uzilishidir.
SaS partiyasi shuningdek, Matush Shutaj Eshtokni Ichki ishlar vaziri lavozimidan isteʼfoga chiqarishga chaqiruvchi taklifni taqdim etish uchun imzo toʻplamoqda. Muxolifat bu masala boʻyicha ovoz berishni keyingi parlament sessiyasida oʻtkazilishini istaydi.
