Ayrim turdagi shaxsga doir maʼlumotlar Oʻzbekiston hududida saqlanishi shartligi belgilandi
Bunga shaxslarning biometrik va genetik maʼlumotlari ham kiradi.
Shaxsga doir maʼlumotlarning samarali himoya qilinishi taʼminlanadi.
Qonun (OʻRQ–1125-son, 26.03.2026 y.) bilan “Shaxsga doir maʼlumotlar toʻgʻrisida”gi Qonunga oʻzgartirish va qoʻshimchalar kiritildi.
Kiritilgan oʻzgartirishlarga koʻra, quyidagi shaxsga doir maʼlumotlar Oʻzbekiston hududida saqlanishi shart:
- shaxslarning biometrik maʼlumotlari;
- shaxslarning genetik maʼlumotlari;
- Oʻzbekiston hududida faoliyat olib borayotgan telekommunikatsiyalar operatorlaridagi ularning xizmatlaridan foydalanuvchi jismoniy shaxslarning maʼlumotlari.
Yuqorida koʻrsatilmagan shaxsga doir maʼlumotlar quyidagi shartlardan biri bajarilganda, Oʻzbekistondan tashqarida saqlanishi va ishlov berilishi mumkin:
- chet davlatni shaxsga doir maʼlumotlarning bir xil himoya qilinishini taʼminlovchi davlat sifatida tan olish;
- operator tomonidan vakolatli davlat organi tasdiqlaydigan talablarga javob beruvchi standart shartnomaviy shartlar yoki majburiy korporativ qoidalar qabul qilinishi va ularga rioya etilishi;
- roʻyxati vakolatli davlat organi tomonidan tasdiqlanadigan shaxsga doir maʼlumotlarni boshqarish va saqlash sohasidagi xalqaro standartlarga operator tomonidan rioya etilishi.
Qonun rasmiy eʼlon qilingan kundan eʼtiboran kuchga kiradi.
