Shavkat Mirziyoyev tojikistonlik madaniyat xodimini mukofotladi
Soʻgʻd viloyati "Nuri niyogon" shashmaqom ansambli rahbari Shuhratjon Nabiyevga "Doʻstlik" ordeni berildi.
Tojikiston Respublikasi Soʻgʻd viloyati "Nuri niyogon" shashmaqom ansambli rahbari Nabiyev Shuhratjon Jurabekovich Oʻzbekistonning "Doʻstlik" ordeni bilan mukofotlandi.
Bu haqda Oʻzbekiston prezidenti farmoni eʼlon qilindi.
U "Oʻzbekiston va Tojikiston oʻrtasidagi keng qamrovli hamkorlik va yaxshi qoʻshnichilik munosabatlarini rivojlantirish, azaliy doʻstlik, strategik sheriklik va madaniy-gumanitar aloqalarni kengaytirish borasidagi katta xizmatlari, koʻp yillik samarali ijodiy faoliyati, maqom sanʼatini rivojlantirish va ommalashtirish, oʻzbek xalqining boy madaniy va maʼnaviy merosini dunyo hamjamiyati oʻrtasida targʻib etishdagi faol ishtiroki hamda mushtarak qadriyat va anʼanalarni asrab-avaylash va boyitish yoʻlidagi ibratli faoliyati uchun" taqdirlandi.
